ഇരിട്ടി : അയ്യന്കുന്ന് പഞ്ചായത്തിലെ വാണിയപ്പാറ, കച്ചേരിക്കടവ് മേഖലകളില് പ്രവര്ത്തിക്കുന്ന ക്വാറികളില് നിന്നുമുള്ള മണ്ണിടിച്ചല് ഭീഷണി മൂലം നിരവധി കുടുംബങ്ങള് ആശങ്കയിലായി. മഴ ശക്തമാകുന്നതോടെ ഇടിച്ചല് വര്ദ്ധിക്കാനിടയുണ്ടെന്ന റിപ്പോര്ട്ടിനെ തുടര്ന്ന് പഞ്ചായത്ത് അധികൃതര് നാല് ക്വാറികളുടെ പ്രവര്ത്തനം നിര്ത്തി വെപ്പിച്ചു. ക്വാറികളില് കൂട്ടിയിട്ടിരിക്കുന്ന ആയിരക്കണക്കിന് ലോഡ്കല്ലും മണ്ണും ശക്തമായ മഴയില് ഒലിച്ചിറങ്ങി നൂറുകണക്കിന്കുടുംബങ്ങള്താമസിക്കുന്ന പ്രദേശത്ത് ഇടിഞ്ഞിറങ്ങി ഇവരുടെ വീടുകള്ക്കും ഏക്ര കണക്കിന് കൃഷിയുംനശിക്കാന് ഇടവരും എന്ന ആശങ്ക ശക്തമാവുകയുംനാട്ടുകാര് പ്രതിഷേധവുമായി ഇറങ്ങുകയും ചെയ്തതോടെ അയ്യന്കുന്ന് പഞ്ചായത്ത് പ്രസിഡന്റ് അഡ്വ. ഷീജ സെബാസ്റ്റ്യന് സ്ഥലം സന്ദര്ശിച്ചു. ഇതിന്റെ ഗൗരവം മനസ്സിലാക്കിയ പഞ്ചായത്ത് ഭരണസമിതി ക്വാറികളുടെ പ്രവര്ത്തനം നിര്ത്തി വെക്കാന് നോട്ടീസ് നല്കി. ഇത് ലംഘിക്കുന്നുണ്ടോ എന്ന് പരിശോധിക്കാനായിപോലീസിനും വില്ലേജ് ഓഫീസര്ക്കും നോട്ടീസ് നല്കിയിട്ടുണ്ട്.
കച്ചേരിക്കടവില് പ്രവര്ത്തിക്കുന്നറോക്ക് സ്റ്റാര് എന്ന ക്രഷറില് കൂട്ടിയിട്ടിരിക്കുന്ന കല്ലും മണ്ണും കഴിഞ്ഞ ദിവസത്തെകനത്ത മഴയില് ഇടിഞ്ഞു വീണു ഇതിനു സമീപം താമസിക്കുന്ന ഇരുപതോളം കുടുംബങ്ങളുടെ കൃഷിയിടങ്ങള് നശിച്ചു. ഈ പ്രദേശത്തു തന്നെ ഇതുപോലുള്ള വേറെയും നിരവധി ക്രഷറുകള് പ്രവര്ത്തിക്കുന്നുണ്ട്. ഇവയില് ലൈസന്സ് ഉള്ളവയും ഇല്ലാത്തവയുമുണ്ട്. വന് പരിത സ്ഥിതി നാശം വരുത്തുന്ന ഇത്തരം ക്രഷറുകളില് നിന്നും ആയിരക്കണക്കിന് ലോഡ്കരിങ്കല്ലുകളാണ് ജില്ലയുടെ വിവിധ ഭാഗങ്ങളിലേക്ക് കൊണ്ട് പോകുന്നത്. ശക്തമായ സ്പോടനം നടത്തിയാണ് ഇവിടങ്ങളില് കരിങ്കല് പാറകള് ഇടിച്ചു നിരത്തുന്നത്. അതുകൊണ്ട് തന്നെ ശക്തമായ മഴയില് ഈ പ്രദേശങ്ങളില് ഉരുള് പൊട്ടാനുള്ള സാദ്ധ്യതയും ഏറെയാണ്. ഇവിടങ്ങളില്ഉരുള് പൊട്ടല് ഉണ്ടായാല് കുന്നിനു മുകളില് കൂട്ടിയിട്ടിരിക്കുന്ന ആയിരക്കണക്കിനു ലോഡ് കല്ലും മണ്ണും താഴേക്ക് പതിച്ചാല് കച്ചേരിക്കടവ്, മുടിക്കയം തുടങ്ങിയ പ്രദേശങ്ങളിലെ നൂറു കണക്കിന് കുടുംബങ്ങളും ഇവരുടെ കൃഷിയിടങ്ങളും നാമാവശേഷമാവും.
ഇപ്പോള് ഉണ്ടായിട്ടുള്ള മണ്ണിടിച്ചിലില് പാറക്കാ മലയിലെ ടി.വി.മധു, ടി.വി. ജേക്കബ്, കെ.വി. രാജേഷ്, ടി.വി.സന്തോഷ്, ദിനേന്ദ്രന്, രാജപ്പന്, ചന്ദ്രന്, ദേവസ്യ, സലിന്, കുട്ടപ്പന് എന്നിവരുടെ കൃഷിയിടങ്ങള്ക്കാണ് നാശനഷ്ടം സംഭവിച്ചിരിക്കുന്നത്.
