ആലപ്പുഴ: മത്സ്യബന്ധനത്തിനിടയില് വയറുവേദന അനുഭവപ്പെട്ടതിനെ തുടര്ന്ന് ആലപ്പുഴ മെഡിക്കല് കോളേജിലെത്തിച്ച മത്സ്യത്തൊഴിലാളി ചികിത്സ കിട്ടാതെ മരിച്ച സംഭവത്തെ കുറിച്ചുള്ള അനേ്വഷണം രണ്ട് മാസത്തിനകം പൂര്ത്തിയാക്കണമെന്ന് സംസ്ഥാന മനുഷ്യാവകാശ കമ്മീഷന് ജുഡീഷ്യല് അംഗം പി. മോഹനദാസ് ഉത്തരവിട്ടു.
അന്തിമ റിപ്പോര്ട്ട് കമ്മീഷനില് സമര്പ്പിക്കണമെന്ന് അമ്പലപ്പുഴ സബ് ഇന്സ്പെക്ടര്ക്കാണ് കമ്മീഷന് നിര്ദ്ദേശം നല്കിയിരിക്കുന്നത്. അമ്പലപ്പുഴ വാടയ്ക്കല് പുന്നയ്ക്കല് വീട്ടില് ലീലാമ്മ സ്റ്റീഫന്റെ പരാതിയിലാണ് നടപടി. 2015 സെപ്റ്റംബര് 4 നായിരുന്നു സംഭവം. പരാതിക്കാരിയുടെ ഭര്ത്താവ് സ്റ്റീഫനെ സെപ്റ്റംബര് 3 ന് മെഡിക്കല് കോളേജിലെത്തിച്ചെങ്കിലും ചികിത്സ നല്കിയില്ലെന്നാണ് പരാതി. ഒരു പകലും രാത്രിയും ചികിത്സ ലഭിക്കാത്തതിനെ തുടര്ന്ന് നാലിന് സ്റ്റീഫന് മരിച്ചുവെന്ന് പരാതിയില് പറയുന്നു.
ആലപ്പുഴ മെഡിക്കല് കോളേജ് സൂപ്രണ്ടില് നിന്നും കമ്മീഷന് വിശദീകരണം തേടിയിരുന്നു. സ്റ്റീഫന് ആവശ്യമായ ചികിത്സ നല്കിയെന്നായിരുന്നു വിശദീകരണം.
തിരുവനന്തപുരം ചീഫ് കെമിക്കല് എക്സാമിനേഴ്സ് ലാബില് നിന്നും പരിശോധനാ ഫലം ലഭിക്കേണ്ടതുണ്ടെന്നും അനേ്വഷണം തുടരുകയാണെന്നും അമ്പലപ്പുഴ പോലീസ് കമ്മീഷനെ അറിയിച്ചു. സ്റ്റീഫനെ ചികിത്സിച്ച ഡോക്ടറെയും മറ്റ് വിദഗ്ദ്ധരെയും കണ്ട് അനേ്വഷണം നടത്തേണ്ടതുണ്ടെന്നും സബ് ഇന്സ്പെക്ടറുടെ വിശദീകരണത്തില് പറയുന്നു.
