കണ്ണൂര്‍: കണ്ണൂരിലെ സിപിഎം നേതൃത്വത്തിലുളള സൊസൈറ്റി മുന്‍കൈയെടുത്ത് വളപട്ടണം പുഴയോരത്ത് പ്രവര്‍ത്തനം ആരംഭിക്കുകയും വിവാദമായതിനെ തുടര്‍ന്ന് പൂട്ടുകയും ചെയ്ത കണ്ടല്‍പാര്‍ക്ക് പാര്‍ക്കിനെതിരെ സമരം ചെയ്ത പരിസ്ഥിതി പ്രവര്‍ത്തകരെ ദേശ ദ്രോഹികളെന്നു വിളിച്ച വ്യവസായ മന്ത്രി ഇ.പി.ജയരാജന്റെ നടപടിക്കെതിരെ വ്യാപക പ്രതിഷേധമുയരുന്നു. കണ്ടല്‍ പാര്‍ക്ക് വീണ്ടും ആരംഭിക്കുമെന്ന മന്ത്രിയുടെ പ്രസ്താവനയും വിവാദമായിരിക്കുകയാണ്.
ലോക പരിസ്ഥിതി ദിനത്തോടനുബന്ധിച്ച് കണ്ടല്‍ പാര്‍ക്ക് നിലനിന്നിടത്ത് കണ്ടല്‍ ചെടികള്‍ നട്ടുകൊണ്ട് ഡിവൈഎഫ്‌ഐ സംഘടിപ്പിച്ച പരിപാടി ഉദ്ഘാടനം ചെയ്തു കൊണ്ട് സംസാരിക്കവേയാണ് പരിസ്ഥിതി പ്രവര്‍ത്തകരെ ദേശദ്രോഹികളെന്ന് വിളിച്ചത്. ഇതേ വേദിയില്‍വെച്ചാണ് പാര്‍ട്ടി സൊസൈറ്റിക്കു കീഴില്‍ ആരംഭിച്ച് കേന്ദ്ര പരിസ്ഥിതി-വനം മന്ത്രാലയത്തിന്റെ ഉത്തരവിനെ തുടര്‍ന്ന് അടച്ചു പൂട്ടേണ്ടി വന്ന പാപ്പിനിശ്ശേരിയിലെ കണ്ടല്‍പാര്‍ക്കിന്റെ പ്രവര്‍ത്തനം പുനരാരംഭിക്കുമെന്ന പ്രഖ്യാപനവും മന്ത്രി നടത്തിയത്.
കണ്ടല്‍ ചെടികളുടെ ആവാസ വ്യവസ്ഥയെ തകര്‍ക്കുന്നതരത്തില്‍ പാപ്പിനിശ്ശേരിയില്‍ കണ്ടല്‍ പാര്‍ക്ക് നിര്‍മ്മിക്കുമെന്ന മന്ത്രിയുടെ പ്രഖ്യാപനത്തിനെതിരെ പ്രതിഷേധവുമായി പൊതുസമൂഹവും പരിസ്ഥിതി പ്രവര്‍ത്തകരും രംഗത്തു വരികയും സംസ്ഥാനത്താകമാനം തന്നെ ചര്‍ച്ചയാവുകയും ചെയ്തിരിക്കുകയാണ്. പരിസ്ഥിതി പ്രവര്‍ത്തകരെ ദേശദ്രോഹികളെന്ന് വിളിച്ചാക്ഷേപിച്ച മന്ത്രിയുടെ പ്രസംഗമാണ് വന്‍ പ്രതിഷേധത്തിന് ഇടയാക്കിയിരിക്കുന്നത്. മന്ത്രി പ്രസ്താവന പിന്‍വലിച്ച് മാപ്പ് പറയണമെന്ന് ജില്ലാ പരിസ്ഥിതിസമിതി ആവശ്യപ്പെട്ടിട്ടുണ്ട്.
ഇ.പി.ജയരാജന്റെ പ്രസ്താവനയ്‌ക്കെതിരെ വലിയൊരു വിഭാഗം പാര്‍ട്ടി പ്രവര്‍ത്തകരും നേതാക്കളും തങ്ങള്‍ക്കുളള അഭിപ്രായ ഭിന്നത ഉന്നത നേതൃത്വത്തെ അറിയിച്ചതായാണ് സൂചന. പാര്‍ട്ടിയുടെ പോഷക സംഘടനയെപ്പോലെ പ്രവര്‍ത്തിക്കുന്ന ബുദ്ധി ജീവിക്കളെന്ന് സ്വയം വിശേഷിപ്പിക്കുന്ന ശാസ്ത്ര സാഹിത്യ പരിഷത്തിന്റെ നേതാക്കളില്‍ ചിലര്‍ മന്ത്രിയുടെ പ്രഖ്യാപനത്തിലും പരിസ്ഥിതി പ്രവര്‍ത്തകരെ ആകെ അടച്ചാക്ഷേപിച്ചതിലും തങ്ങള്‍ക്കുളള അഭിപ്രായ വിത്യാസം സിപിഎം നേതൃത്വത്തെ അറിയിച്ചിരുന്നു.
അമേരിക്കകാരനായ പ്രമുഖ ബോക്‌സിംഗ് താരം അമേരിക്കക്കാരനായ മുഹമ്മദലിയെ മലയാളി കായികതാരമാക്കി ദൃശ്യമാധ്യമത്തിലൂടെ അനുശോചനം അറിയിച്ച് സംസ്ഥാനത്ത് അധികാരത്തിലെത്തിയ പുതിയ മന്ത്രിസഭയെ ആകെ അവഹേളിക്കുന്ന രീതിയില്‍ അഭിപ്രായ പ്രകടനം നടത്തി വിവാദത്തില്‍പ്പെട്ട് സോഷ്യല്‍ മീഡിയകളിലും പൊതു സമൂഹത്തിലും അവമതിപ്പുണ്ടാക്കിയതിനു പിന്നാലെ കണ്ടല്‍പാര്‍ക്കുമായി ബന്ധപ്പെട്ടും വ്യവസായ മന്ത്രിയും സിപിഎം നേതാവുമായ ഇ.പി.ജയരാജന്‍ നടത്തിയ പ്രഖ്യാപനവും വിവാദങ്ങല്‍ക്കും വാദപ്രതിവാദങ്ങള്‍ക്കും വഴിവെച്ചിരിക്കുകയാണ്. കണ്ടല്‍ പാര്‍ക്ക് വിവാദം വരും ദിവസങ്ങളില്‍ സിപിഎമ്മിനകത്തും പൊതു സമൂഹത്തിലും കൂടുതല്‍ ചര്‍ച്ചകള്‍ക്ക് വഴിവെയ്‌ക്കുമെന്നുറപ്പാണ്.
