അമ്പലപ്പുഴ: കടല്ക്ഷോഭത്തില് വീടും സ്ഥലവും നഷ്ടപെട്ടവരെ അടിയന്തിരമായി പുനരധിവസിപ്പിക്കണമെന്ന് ഭാരതീയ മത്സ്യ പ്രവര്ത്തക സംഘം സംസ്ഥാന വൈസ് പ്രസിഡന്റ് എന്.പി. രാധാകൃഷ്ണന് ആവശ്യപ്പെട്ടു.
ഭാരതീയ മത്സ്യ പ്രവര്ത്തക സംഘത്തിന്റെ നേതൃത്ത്വത്തില് കടല്ക്ഷോഭ മേഖലയില് സന്ദര്ശനം നടത്തിയ ശേഷമാണ് അദ്ദേഹം ഇക്കാര്യം ഉന്നയിച്ചത്. പുറക്കാട്, അമ്പലപ്പുഴ പഞ്ചായത്തുകളിലായി നൂറുകണക്കിന് കുടുംബങ്ങളാണ് കിടപ്പാടം നഷ്ടപ്പെട്ട് തെരുവിലും, ക്യാമ്പുകളിലും, ബന്ധുവീടുകളിലുമായി കഴിയുന്നത്.
എല്ലാം ശരിയാവും എന്ന് പ്രചരിപ്പിച്ച് അധികാരത്തില് എത്തിയവര് ഒന്നും ശരിയാക്കുന്നതായും കാണുന്നില്ല. ഇടതു വലതു മുന്നണികള് പരസ്പരം പഴിചാരി പുനരധിവാസം അട്ടിമറിക്കാനാണ് ശ്രമം നടക്കുന്നത്. പൊതുമരാമത്ത് മന്ത്രിയുടെ സ്വന്തം മണ്ഡലത്തിലാണ് തീരവാസികള് ദുരന്തം അനുഭവിക്കുന്നത്.
എല്ലാ കാര്യങ്ങള്ക്കും അഭിപ്രായം പറയുന്ന സുധാകരന് മൗനം വെടിയണമെന്നും കടല്ക്ഷോഭ മേഖലയില് ശാശ്വത പരിഹാരം കാണമെന്നും രാധാകൃഷ്ണന് ആവശ്യപ്പെട്ടു. കഴിഞ്ഞ സര്ക്കാര് മതം നോക്കി നടത്തിയ പുലിമുട്ടു നിര്മ്മാണമാണ് നിരവധി കുടുംബങ്ങള് പെരുവഴിയിലാകാന് സാഹചര്യം ഒരുക്കിയത്.
അടിയന്തരമായി ദുരിതാശ്വാസ ക്യാമ്പുകളിലും, വീടു നഷ്ടപ്പെട്ട് ബന്ധുവീടുകളില് അഭയം പ്രാപിച്ചവര്ക്കും സൗജന്യ റേഷനും പുനരധിവാസവും ഉറപ്പാക്കണമെന്നും രാധാകൃഷ്ണന് ആവശ്യപ്പെട്ടു. പുറക്കാട്, വളഞ്ഞ വഴി കടല്ക്ഷോഭ മേഖലകളും അദ്ദേഹം സന്ദര്ശിച്ചു.
മത്സ്യ പ്രവര്ത്തക സംഘം ജില്ലാ പ്രസിഡന്റ് ഡി. സുരേഷ്, സെക്രട്ടറി അഡ്വ: രണ്ജിത്ത് ശ്രിനിവാസ,് ഗ്രാമപഞ്ചായത്തഗം ബിന്ദു ഷാജി എന്നിവരും അദ്ദേഹത്തോടൊപ്പമുണ്ടായിരുന്നു.
