ബൊണ്പാര (ബംഗ്ലാദേശ്): മുസ്ലിം ഭൂരിപക്ഷ രാജ്യമായ ബംഗ്ലാദേശില് ന്യൂനപക്ഷങ്ങള്ക്കു നേരെ പരക്കെ ആക്രമണം. അറുപത്തിയഞ്ചുകാരന് സുനില് ഗോമസാണ് കഴിഞ്ഞ ദിവസം അജ്ഞാതന്റെ ആക്രമണത്തില് കൊല്ലപ്പെട്ടത്. സ്വന്തം കടയുടെ മുന്നില് മരിച്ചു കിടക്കുന്ന നിലയിലായിരുന്നു സുനിലിനെ കണ്ടെത്തിയത്.
ആരാണ് ആക്രമണം നടത്തിയതെന്ന് മനസ്സിലാക്കാന് സാധിച്ചില്ലെന്നും മുന്പ് ന്യൂനപക്ഷമായ ഹിന്ദുക്കള്ക്ക് നേരെയുണ്ടായതിന് സമാനമായ ആക്രമണം തന്നെയാണിതെന്ന് പോലീസ് അറിയിച്ചു.
അതേസമയം, ധാക്കയില് നടന്ന മറ്റൊരാക്രമണത്തില് പോലീസുദ്യോഗസ്ഥന്റെ ഭാര്യ കൊല്ലപ്പെട്ടു. ബംഗ്ലാദേശ് എസ്പി: ബബൂള് അക്തറിന്റെ ഭാര്യ മെഹമുദ അക്തറാണ് കൊല്ലപ്പെട്ടത്. ഭീകരാക്രമണമാണുണ്ടായതെന്ന് പോലീസ് പറഞ്ഞു.
മകനെ സ്കൂളിലയയ്ക്കുന്നതിനായി പോകുമ്പോളാണ് മെഹമുദ അക്തറിന് നേരെ നിറയൊഴിച്ചത്. ഭീകരര്ക്കു നേരെയുള്ള ബബൂള് കൈക്കൊണ്ട ശക്തമായ നിലപാടുകളാണ് മെഹമുദയുടെ കൊലപാതകത്തില് കലാശിച്ചതെന്ന് കരുതുന്നു.
ന്യൂനപക്ഷങ്ങള്ക്കു നേരെ നിരവധി ആക്രമണങ്ങളാണ് ബംഗ്ലാദേശില് നടന്നത്. മൂന്നു വര്ഷങ്ങള്ക്കുള്ളില് 40ലധികം ആളുകള് ഇവിടെ കൊല്ലപ്പെട്ടു. ഇതിന്റെ ഉത്തരവാദിത്തം ഭീകരസംഘടനകളായ അല് ഖ്വയിദയും ഇസ്ലാമിക് സ്റ്റേറ്റും അടക്കമുള്ളവ ഏറ്റെടുത്തിരുന്നു.
