ദോഹ: ഖത്തറിലെ ഭാരതീയ തൊഴിലാളികള്ക്ക് ആവേശവും അഭിമാനവും പകര്ന്ന് പ്രധാനമന്ത്രി നരേന്ദ്ര മോദിയെത്തി. പഞ്ചരാഷ്ട്ര സന്ദര്ശനത്തിന്റെ ഭാഗമായി ഖത്തറിലെത്തിയ മോദിക്ക് ആവേശോജ്ജ്വലമായ വരവേല്പ്പാണ് ലഭിച്ചത്. മോദിയെ ഖത്തര് പ്രധാനമന്ത്രി ഷെയ്ഖ് അബ്ദുല്ല ബിന് നാസര് ബിന് ഖലീഫ അല്താനി സ്വീകരിച്ചു. മുഷൈരിബ് ഡൗണ് ടൗണ് പ്രോജക്ടില് ഭാരത തൊഴിലാളികള്ക്കു വേണ്ടിയുള്ള മെഡിക്കല് ക്യാമ്പ് പ്രധാനമന്ത്രി സന്ദര്ശിച്ചു. ഭാരത കമ്യൂണിറ്റി ബെനവലന്റ് ഫോറ (ഐസിബിഎഫ്)ത്തിന്റെ നേതൃത്വത്തിലാണു 350 പേര്ക്കായി ക്യാമ്പ് നടത്തിയത്.
ഖത്തറിലെത്തിയ തന്റെ ആദ്യപരിപാടി നിങ്ങളെ കാണുകയെന്നതായിരുന്നുവെന്ന് മെഡിക്കല് ക്യാമ്പ് സന്ദര്ശിച്ചുകൊണ്ട് നരേന്ദ്ര മോദി പറഞ്ഞു. ആദ്യമായാണ് ഒരു ഭാരത പ്രധാനമന്ത്രി ഇത്തരത്തിലുള്ള ഒരു പരിപാടിയില് പങ്കെടുക്കുന്നത്. തൊഴിലാളികളുടെ പ്രശ്നങ്ങള് എന്തൊക്കെയാണെന്നും മോദി ചോദിച്ചറിഞ്ഞു. പ്രശ്നങ്ങള്ക്ക് ആവശ്യമായ പരിഹാരം കണ്ടെത്താന് ശ്രമിക്കുമെന്നും അദ്ദേഹം പറഞ്ഞു. ആഗോളതലത്തില് ഭാരതത്തിന്റെ പ്രതിച്ഛായ ഉണ്ടാക്കുന്നത് പ്രധാനമന്ത്രിയോ അംമ്പാസഡറോ അല്ല, മറിച്ച് നല്ല പെരുമാറ്റത്തിലൂടെ ഭാരതത്തിലെ തൊഴിലാളികളാണെന്നും മോദി പറഞ്ഞു.
കഴിഞ്ഞ വര്ഷം ഇവിടത്തെ അമീര് ഭാരതം സന്ദര്ശിച്ചപ്പോള് പറഞ്ഞത് ഖത്തറിന്റെ വികസനത്തിന് ഭാരത സമൂഹം നല്കുന്ന സംഭാവന വിലമതിക്കാനാവാത്തതാണെന്നാണ്. ഇവിടത്തെ ഭാരതസമൂഹത്തെ ഗള്ഫ് ഭരണാധികാരികള് ഏറെ സ്നേഹിക്കുന്നുവെന്നാണ് മനസിലാക്കുന്നതെന്നും മോദി പറഞ്ഞു. ഭാരത തൊഴിലാളികള് നേരിടുന്ന പ്രശ്നങ്ങള് ഖത്തര് നേതൃത്വത്തിന്റെ മുമ്പില് അവതരിപ്പിക്കും.
ഇവിടത്തെ നിയമങ്ങളില് വന്ന മാറ്റങ്ങളില് എന്തെങ്കിലും ബുദ്ധിമുട്ടുകളുണ്ടെങ്കില് അവ പരിഹരിക്കുന്നതിനായി നിങ്ങള്ക്കൊപ്പം നിന്ന് പ്രവര്ത്തിക്കും. നിങ്ങള് കഠിനമായി അധ്വാനിക്കുന്നുണ്ട്, ഒപ്പം ആരോഗ്യവും ശരീരവും ശ്രദ്ധിക്കണമെന്നും മോദി പറഞ്ഞു. ലഘുപ്രസംഗത്തിന് ശേഷം തൊഴിലാളികളെ ഓരോരുത്തരായി കണ്ട് അവരോട് സംസാരിക്കുന്നതിനും പ്രശ്നങ്ങള് മനസിലാക്കുന്നതിനും മോദി ശ്രമിച്ചു. തൊഴിലാളികള്ക്കൊപ്പം മോദി ഭക്ഷണവും കഴിച്ചു.
നമ്മുടെ കുടുംബത്തിലെ ഒരാള് നമ്മളെ സന്ദര്ശിക്കുന്ന പ്രതീതിയാണുണ്ടായതെന്ന് മോദിയുടെ സന്ദര്ശനത്തെക്കുറിച്ച് നിറകണ്ണുകളോടെ ഒരു തൊഴിലാളി പറഞ്ഞു. തീര്ച്ചായായും ഭാരത ചരിത്രത്തിലെ ആദ്യത്തെ സംഭവമാണിത്. മറ്റ് രാഷ്ട്രീയക്കാര് ഇതെങ്ങനെ സംഭവിക്കുന്നു എന്ന് വിചാരിച്ച് അത്ഭുതപ്പെടുന്നുണ്ടാകുമെന്നും തൊഴിലാളികള് പറഞ്ഞു. അഫ്ഗാനിസ്ഥാന് സന്ദര്ശനം പൂര്ത്തിയാക്കിയതിന് ശേഷമാണ് മോദി ഖത്തറില് ശനിയാഴ്ച എത്തിയത്. ഖത്തര് സന്ദര്ശനത്തിന് ശേഷം പ്രധാനമന്ത്രി സ്വിറ്റ്സര്ലാന്ഡിലേക്ക് പോകും.
