ചേര്ത്തല: റോഡ്, കെട്ടിട നിര്മാണത്തിനായുള്ള യന്ത്രസാമഗ്രികള് ഘടിപ്പിച്ച മോട്ടര് വാഹനം മതിയായ രേഖകളില്ലാത്തതിന്റെ മോട്ടോര് വാഹന വകുപ്പ് പിടിച്ചെടുത്തു. ദേശീയപാതയില് പ്രൊവിഡന്സ് കവലയ്ക്ക് സമീപം നടത്തിയ വാഹനപരിശോധനയ്ക്കിടയിലാണ് ആലപ്പുഴ സ്വദേശിയായ കരാറുകാരന്റെ ഉടമസ്ഥതയിലുള്ള 45 ലക്ഷം രൂപ വിലവരുന്ന വാഹനം പിടിച്ചെടുത്തത്.
പരിശോധനയില് വാഹനത്തിന് രേഖകളോ സംസ്ഥാന രജിസ്ട്രേഷനോ ഇല്ലെന്ന കണ്ടെത്തി. സംഭവത്തെ കുറിച്ച് ട്രാന്സ്പോര്ട്ട് കമ്മീഷണര് റിപ്പോര്ട്ട് ആവശ്യപ്പെട്ടതിനെ തുടര്ന്ന് വിശദവിവരങ്ങള് കൈമാറി. ആലപ്പുഴ ആര്ടിഒയുടെ പരിധിയിലായതിനാല് വാഹനവും രേഖകളും പിന്നീട് കൈമാറി. വാഹനം ഓഫീസിലെത്തിച്ച് നികുതിയായ മൂന്നരലക്ഷം രൂപ അടയ്ക്കാമെന്ന കരാറുകാരന്റെ ഉറപ്പിന്മേലാണ് ഇവ വിട്ടു നല്കിയത്.
2012 ല് ഗുജറാത്തിലെ അപ്പോളോ എര്ത്ത് മൂവേഴ്സില് നിന്ന് വാങ്ങിയ വാഹനം താല്ക്കാലിക രജിസ്ട്രേഷനിലാണ് സംസ്ഥാനത്ത് ഓടിക്കൊണ്ടിരുന്നത്. മോട്ടോര് വാഹന വകുപ്പ് ഉദ്യോഗസ്ഥര് കമ്പനി അധികൃതരുമായി ബന്ധപ്പെട്ടതിനെ തുടര്ന്നാണ് വാഹനത്തിന്റെ താല്ക്കാലിക രജിസ്ട്രേഷന്റെയും ഉടമസ്ഥതയുടെയും രേഖകള് ലഭിച്ചത്.
വര്ഷം തോറും നിര്മാണ പ്രവര്ത്തനങ്ങള്ക്കായി നിരവധി വാഹനങ്ങള് ഇത്തരത്തില് കേരളത്തിലേക്ക് എത്തുന്നുണ്ടെന്നാണ് കമ്പനി അധികൃതരില് നിന്ന് ലഭിച്ച വിവരം. ഇവ രജിസ്റ്റര് ചെയ്യാത്തത് മൂലം നികുതിയിനത്തില് സര്ക്കാരിന് കോടികളുടെ നഷ്ടമാണ് ഉണ്ടാകുന്നത്.
