ന്യൂദല്ഹി: മരുമകന് റോബര്ട്ട് വാദ്രയ്ക്കെതിരെ എന്ഫോഴ്സ്മെന്റ് ഡയറക്ടറേറ്റിന്റെ അന്വേഷണം ആരംഭിച്ചതോടെ പ്രധാനമന്ത്രി നരേന്ദ്ര മോദിക്കെതിരെ രൂക്ഷ വിമര്ശനവുമായി കോണ്ഗ്രസ് അധ്യക്ഷ സോണിയാഗാന്ധി രംഗത്ത്. നരേന്ദ്ര മോദി പ്രധാനമന്ത്രിയാണെന്നും ചക്രവര്ത്തിയെപ്പോലെ പെരുമാറരുതെന്നും സോണിയ കുറ്റപ്പെടുത്തി. രാജ്യത്ത് ദാരിദ്ര്യവും കര്ഷക ദുരിതങ്ങളും നിലനില്ക്കുമ്പോള് വാര്ഷികാഘോഷങ്ങള് നടത്തുന്നത് നല്ല പ്രവണതയല്ലെന്നും സോണിയ പറഞ്ഞു.
എന്നാല് സോണിയാഗാന്ധിയുടെ പ്രസ്താവനയ്ക്കെതിരെ രൂക്ഷ വിമര്ശനം നടത്തിയ ബിജെപി ദരിദ്രകുടുംബാംഗമായ ഒരാള് സ്വന്തം കഠിനാധ്വാനത്തിലൂടെ ഭാരതത്തിന്റെ പ്രധാനമന്ത്രിയായത് ഇനിയും ഉള്ക്കൊള്ളാന് സോണിയാകുടുംബത്തിന് കഴിഞ്ഞിട്ടില്ലെന്ന് പറഞ്ഞു. ഒരു ദശകത്തിലേറെക്കാലം രാജ്യത്തെ കുത്തകയാക്കി വെച്ച കോണ്ഗ്രസ് ചക്രവര്ത്തിയെന്ന വാക്കിന്റെ അര്ത്ഥം ശരിക്കും മനസ്സിലാക്കണമെന്ന് ബിജെപി വക്താവ് സംപിത് പാത്ര പറഞ്ഞു.
രാജ്യത്തെ അടക്കിഭരിക്കുന്നവരെയാണ് ചക്രവര്ത്തിമാരെന്ന് വിളിക്കാറുള്ളത്. അതിനാല് തന്നെ ആ വിശേഷണത്തിന് ഏറ്റവും യോജിച്ചത് നെഹ്രു കുടുംബമാണ്. ഭാരതത്തെ അവരുടെ സ്വകാര്യ സ്വത്തായാണ് അവര് കൊണ്ടുനടന്നതെന്നും സംപിത് പാത്ര കുറ്റപ്പെടുത്തി.
പാവപ്പെട്ടവന് പ്രധാനമന്ത്രിയായത് ഉള്ക്കൊള്ളാന് ഇനിയുമവര്ക്ക് സാധിച്ചിട്ടില്ല. അതിന്റെ രോഷവും നിരാശയുമാണ് ഇത്തരത്തിലുള്ള പ്രസ്താവനകളിലൂടെ സോണിയാഗാന്ധി പ്രകടിപ്പിക്കുന്നതെന്നും ബിജെപി പ്രതികരിച്ചു.
