കോട്ടയം: മറ്റക്കര ഇഞ്ചനാട്ടിയില് കൃഷ്ണരാജി (23)ന്റെ ദുരൂഹ മരണത്തെ സംബന്ധിച്ച് അന്വേഷണമാവശ്യപ്പെട്ട് അച്ഛന് ഇ.എ. രാജന് പരാതി നല്കി. കഴിഞ്ഞ 22ന് രാവിലെ പന്നിമറ്റം റയില്വേ ഓവര്ബ്രിഡ്ജിനു സമീപം റയില്വേ ട്രാക്കിന് സമീപം ഗുരുതര പരിക്കുകളോടെ കൃഷ്ണരാജിനെ കണ്ടത്തുന്നത്. നാട്ടുകാര് വിവരമറിയിച്ചതനുസരിച്ചെത്തിയ ചിങ്ങവനം പോലീസ് ഇയാളെ മെഡിക്കല് കോളേജില് എത്തിക്കുകയായിരുന്നു. അടിയന്തിര ശസ്ത്രക്രീയക്കായി ഓപ്പറേഷന് തീയറ്ററില് പ്രവേശിപ്പിച്ച കൃഷ്ണരാജിന്റെ ജീവന് രക്ഷിക്കാനായില്ല.
21ന് ഉച്ചയോടെ മൊബൈല് ഫോണ് നന്നാക്കുന്നതിനായി മറ്റക്കരയിലെ വീട്ടില്നിന്നും അയര്ക്കുന്നത്തേക്ക് പോയത്. വൈകിട്ട് ഏഴരയോടെ കൃഷ്ണരാജ് ഫോണ് നന്നാക്കുന്നതിനായി കോട്ടയത്തേക്ക് പോകുകയാണെന്ന് അയല്വാസിയുടെ ഫോണിലേക്ക് വിളിച്ച് പറഞ്ഞിരുന്നു. രാത്രി ഏറെ വൈകിയിട്ടും വീട്ടില് തിരിച്ചെത്താത്തതിനെ തുടര്ന്ന് വിളിച്ചപ്പോള് ”ഞാന് വീട്ടിലേക്ക് വന്നുകൊണ്ടിരിക്കുകയാണെന്ന് പറഞ്ഞത്. പിന്നീട് കൃഷ്ണരാജിനെ ബന്ധപ്പെടുവാന് വീട്ടുകാര്ക്കു കഴിഞ്ഞിട്ടില്ല.
അടുത്ത ദിവസം രാവിലെ 6.45ന് ഏറ്റുമാനൂര് പോലീസ് സ്റ്റേഷനില് നിന്നാണെന്നും പറഞ്ഞ് കൃഷ്ണരാജിന്റെ അച്ഛന് ഒരു ഫോണ് കോള്വന്നു. മകന് ഒരു സ്ത്രീയുമായി കറങ്ങിനടക്കുകയാണെന്നും എത്രയുംവേഗം സ്റ്റേഷനിലെത്തണമെന്നുമായിരുന്നു നിര്ദ്ദേശം. ഇതനുസരിച്ച് ഏറ്റുമാനൂര് സ്റ്റേഷനിലെത്തിയ കൃഷ്ണരാജിന്റെ പിതാവിനോട് ഇങ്ങനെ ഒരു സംഭവമറിയില്ലെന്നാണ് അധികൃതര് പറഞ്ഞത്. ഇതിന് ശേഷമാണ് പരിക്കുകളോടെ കൃഷ്ണരാജിനെ മെഡിക്കല് കോളേജില് എത്തിച്ചിട്ടുണ്ടെന്ന വിവരം അറിയുന്നത്. ബന്ധുക്കള് മെഡിക്കല് കോളേജിലെത്തുമ്പോഴേക്കും കൃഷ്ണരാജ് മരണപ്പെട്ടിരുന്നു.
മകന് കൃഷ്ണരാജിന്റെ മരണത്തില് ദുരൂഹതയുണ്ടെന്നും സമഗ്രമായ അന്വേഷണം വേണമെന്നും ആവശ്യപ്പെട്ട് പിതാവ് രാജന് ഇ.എ. ചിങ്ങവനം എസ്ഐക്ക് പരാതി നല്കി. കൃഷ്ണരാജിനെ ദുരൂഹസാഹചര്യത്തില് ഗുരുതര പരിക്കുകളോടെ റെയില്വേ ട്രാക്കില് കാണപ്പെട്ട സംഭവവുമായി ബന്ധപ്പെട്ടു പിതാവ് നല്കിയ പരാതിയുടേയും അടിസ്ഥാനത്തില് അന്വേഷണം പുരോഗമിച്ചുവരികയാണെന്ന് പോലീസ് അധികൃതര് പറയുന്നു.
