കണ്ണൂര്: നിയമസഭാ തെരഞ്ഞെടുപ്പില് കണ്ണൂര് ജില്ലയില് ആവേശോജ്ജ്വലമായ പ്രതികരണമാണുണ്ടായത്. രാവിലെ ഏഴുമണിമുതല് തന്നെ വിവിധ മണ്ഡലങ്ങളിലെ ബൂത്തുകള്ക്ക് മുമ്പില് നീണ്ട ക്യൂ ദൃശ്യമായിരുന്നു. കണ്ണൂര് മണ്ഡലത്തിലെ ചൊവ്വ ധര്മ്മസമാജം യുപി സ്കൂള്, കാഞ്ഞിരോട് ശങ്കരവിലാസം യുപി സ്കൂള്, കാഞ്ഞിരോട് മാപ്പിള യുപി സ്കൂള്, തളാപ്പ് മിക്സഡ് യുപി, താവക്കര യുപി എന്നീ വിദ്യാലയങ്ങളിലെ ബൂത്തുകളില് അതിരാവിലെ തന്നെ വോട്ടര്മാരെത്തി.
ധര്മ്മടം മണ്ഡലത്തിലെ ആര്സി അമല യുപി, പേരാവൂര് മണ്ഡലത്തിലെ മണത്തണ യുപി, ഇരിക്കൂര് മണ്ഡലത്തിലെ മദ്രസ യുപി സ്കൂള്, പയ്യന്നൂര് മണ്ഡലത്തിലെ കണ്ടോന്താര് യുപി, കല്യാശ്ശേരിയിലെ കല്യാശ്ശേരി യുപി., അഴീക്കോട് മണ്ഡലത്തിലെ ചാലില് യുപി എസ്, മട്ടന്നൂര് മണ്ഡലത്തിലെ മട്ടന്നൂര് എച്ച്എസ്എസ്, തലശ്ശേരിയിലെ തിരുവങ്ങാട് യുപി, തളിപ്പറമ്പ് മണ്ഡലത്തിലെ അക്കിപ്പറമ്പ് യുപി, കൂത്തുപറമ്പ് മണ്ഡലത്തിലെ പിആര് മെമ്മോറിയല് എച്ച്എസ്എസ് തുടങ്ങിയ വിദ്യാലയങ്ങളിലും രാവിലെ തന്നെ നീണ്ട ക്യൂ ഉണ്ടായി. ജില്ലാ ഭരണകൂടത്തിന്റെ ആഭിമുഖ്യത്തില് സ്വീപ്പ് വിഭാഗം നടത്തിയ വോട്ടവകാശ പ്രചാരണ പരിപാടിയുടെ വലിയ നേട്ടമാണിത്. പൊതുവെ സമാധാനപരമായ തെരഞ്ഞെടുപ്പിന് ഇലക്ഷന് വിഭാഗവും റവന്യു, എംസിസി, എംസിഎസി, പൊലീസ്, വെബ്കാസ്റ്റിംഗ് തുടങ്ങിയ വിവിധ വിഭാഗങ്ങളും തോളോടുതോള് ചേര്ന്നാണ് പ്രവര്ത്തിച്ചത്. സമാധാനപരവും നീതിപൂര്വ്വവുമായ തെരഞ്ഞെടുപ്പിനായി ജില്ലാ ഭരണകൂടം നടപ്പാക്കിയ പദ്ധതികളും വ്യാപകമായ ഫലം കണ്ടു.
ഉച്ചക്ക് അല്പം മന്ദഗതിയിലായ പോളിംഗ് ക്രമേണ വീണ്ടും ശക്തമായി. അഞ്ചുമണിയോടെ തന്നെ നീണ്ട ക്യൂ വീണ്ടും ദൃശ്യമായി തുടങ്ങി. ആറുമണിക്ക് ക്യൂവിലുണ്ടായ മുഴുവന് പേര്ക്കും സ്ലിപ്പ് നല്കി തെരഞ്ഞെടുപ്പ് നടപടികള് സമ്പൂര്ണ്ണമായും സുതാര്യമാക്കി ഇലക്ഷന് അധികൃതര് മാതൃകയായി.
