മാഹി: മാഹി നിയോജക മണ്ഡലത്തില് മത്സരിക്കുന്ന കോണ്ഗ്രസ് സ്ഥാനാര്ത്ഥി ഇ.വത്സരാജ് വരണാധികാരിക്ക് മുമ്പാകെ സമര്പ്പിച്ച നോമിനേഷനും അതോടൊപ്പം നല്കിയ അനുബന്ധ സത്യവാങ്ങ്മൂലത്തിലും തന്റെയും ഭാര്യയുടെയും പേരിലുള്ള സ്വത്തിന് സര്ക്കാര് നിശ്ചയിച്ച ഫെയര് വാല്യൂവിലും കുറഞ്ഞ തുക കാണിച്ച് നിലവിലെ ജനപ്രതിനിധിയും മുന്മന്ത്രിയും എന്ന നിലയില് പാലിക്കേണ്ട മാനദണ്ഡങ്ങളൊന്നും പാലിക്കാതെ സത്യവാങ്ങ്മൂലത്തിനെതിരായി പ്രവര്ത്തിച്ചിരിക്കുകയാണെന്ന് മാഹിയിലെ പൊതുപ്രവര്ത്തകന് എ.സുനില് പത്രസമ്മേളനത്തില് ആരോപിച്ചു.
മാഹി മേഖലയില് അദ്ദേഹത്തിനും ഭാര്യക്കും സ്വന്തമായി ഉണ്ടെന്ന് നോമിനേഷനില് കാണിച്ചിരിക്കുന്ന ഇരുപത് സെന്റ് സ്ഥലം, അഞ്ച് കെട്ടിടങ്ങള് തുടങ്ങിയവക്ക് പോണ്ടിച്ചേരി സര്ക്കാര് നിശ്ചയിച്ച നിലവിലെ ഫെയര് വാല്യുവിലും കുറഞ്ഞ തുകയാണ് കാണിച്ചിരിക്കുന്നത്. വല്സരാജിന്റെ ഭാര്യ മാനേജിങ്ങ് പാര്ട്ണറായ തിരുവോണം വൈന്സില് ക്യാപ്പിറ്റല് ഇന്വെസ്റ്റ്മെന്റ് തുകയും അദ്ദേഹം തന്റെ പേരിലുള്ള ബാങ്ക് അക്കൗണ്ടുകളും തുകയും മറച്ചുവെച്ചെന്നും സുനില് പറഞ്ഞു.
വയനാട് ജില്ലയിലെ വൈത്തിരി താലൂക്കിലുള്ള വല്സരാജിന്റെ ഭാര്യയുടെയും മകളുടെയും പേരിലുള്ള 25.345 ഏക്കര് ഭൂമിക്ക് കേരള സര്ക്കാര് നിശ്ചയിച്ച നിലവിലെ ഫെയര് വാല്യൂവിന്റെ പകുതിപോലും കാണിച്ചിട്ടില്ല.
2011 ല് നടന്ന അസംബ്ലി തെരഞ്ഞെടുപ്പില് ഇ,.വത്സരാജ് നല്കിയ നോമിനേഷനില് അദ്ദേഹത്തിന്റെ ഭാര്യ 2009 സെപ്തംബര് 15 ന് സുജിത്ത് മാഹി എന്ന വ്യക്തിക്ക് 3,00,000 രൂപ നല്കിയതായി കാണിച്ചിരിക്കുന്നു. ഈ തെരഞ്ഞെടുപ്പിലും അതേ തീയ്യതിക്ക് 2,05,000 രൂപ സുജിത്ത് മാഹിക്ക് നല്കിയതായി പറഞ്ഞിരിക്കുന്നു. ഒരേ തീയ്യതിയില് ഒരേ വ്യക്തിക്ക് നല്കിയ തുകയില് വ്യത്യസ്തതയുണ്ടായത് സത്യവാങ്ങ്മൂലത്തിന് എതിരാണെന്നും അദ്ദേഹം പറഞ്ഞു.
നോട്ടിഫിക്കേഷനില് കാണിച്ചിരിക്കുന്നതില് നിന്നും അഞ്ചോ പത്തോ ഇരട്ടിയിലധികം തുക മറച്ചുവെച്ചിരിക്കുകയാണ്. ഇതിന്റെ അടിസ്ഥാനത്തില് ഇ.വത്സരാജിന്റെ സ്ഥാനാര്ത്ഥിത്വം അയോഗ്യമാക്കി നിയമനടപടികള്ക്കായി പരാതി കൊടുത്തിട്ടുണ്ടെന്നും സുനില് പറഞ്ഞു.
