ന്യൂദല്ഹി: വിവാദ വ്യവസായി വിജയ് മല്ല്യക്കെതിരെ റെഡ് കോര്ണര് നോട്ടീസ് പുറപ്പെടുവിക്കണമെന്ന് എന്ഫോഴ്സ്മെന്റ് ഡയറക്ടറേറ്റ് ഇന്റപോളിനോട് ആവശ്യപ്പെട്ടു. അന്താരാഷ്ട്ര തലത്തിലെ അറസ്റ്റ് വാറണ്ടിനു തുല്യമാണ് ഇന്റര്പോളിന്റെ നോട്ടീസ്. 1971 യുകെ എമിഗ്രേഷന് ആക്ട് പ്രകാരം സാധുവായ പാസ്പോര്ട്ടിലാണ് മല്ല്യ ലണ്ടനിലെത്തിയത്. പിന്നീട് പാസ്പോര്ട്ട് റദ്ദാക്കിയാലും ഇയാളെ മടക്കി അയയ്ക്കണമെങ്കില് ഭാരതം മല്ല്യയ്ക്കെതിരെ കുറ്റപത്രം നല്കിയശേഷം നാടുകടത്താന് ആവശ്യപ്പെടണമെന്ന് ബ്രിട്ടന് കഴിഞ്ഞ ദിവസം അറിയിച്ചിരുന്നു.
തുടര്ന്നാണ് റെഡ്കോര്ണര് നോട്ടീസ് പുറപ്പെടുവിക്കാന് ആവശ്യപ്പെട്ടത്.
മല്ല്യയെ ഭാരതത്തിലേക്കു മടക്കി അയയ്ക്കണമെന്ന് വിദേശകാര്യ മന്ത്രാലയമാണ് ബ്രിട്ടനോട് ആവശ്യപ്പെട്ടത്. മല്ല്യക്കെതിരെയുള്ള കേസുകള് ഗൗരവമുള്ളതായതിനാലാണ് കുറ്റപത്രം നല്കാന് ആവശ്യപ്പെട്ടതെന്നു ബ്രിട്ടന് പ്രതികരിച്ചു.
കിങ്ഫിഷര് എയര്ലൈന്സിന്റെ പേരിലെടുത്ത 9000 കോടിയിലധികം രൂപ തിരിച്ചടയ്ക്കാത്തതിനെ തുടര്ന്ന് ബാങ്കുകളുടെ കണ്സോര്ഷ്യം ആവശ്യപ്പെട്ടതിന്റെ അടിസ്ഥാനത്തിലാണ് ഭാരതം മല്ല്യക്കെതിരെയുള്ള നിയമനടപടികള് ആരംഭിച്ചത്. ഇതുമായി ബന്ധപ്പെട്ട് എന്ഫോഴ്സ്മെന്റ് ഡയറക്ടറേറ്റ് മൂന്നു തവണ ഹാജരാകാന് ആവശ്യപ്പെട്ട് സമന്സ് അയച്ചെങ്കിലും മല്ല്യ അത് നിരസിച്ചു. ഇതോടെയാണ് പാസ്പോര്ട്ട് റദ്ദാക്കുന്നതുള്പ്പെടെയുള്ള നടപടികള് ഭാരതം സ്വീകരിച്ചത്.
