തിരുവോണപ്പുറം ട്രെഞ്ചിംഗ് ഗ്രൗണ്ടില് മാലിന്യത്തില് നിന്നും ഭക്ഷണം ശേഖരിച്ച് കഴിക്കുന്ന കുട്ടികള്
(ഫയല് ഫോട്ടോ)
കണ്ണൂര്: പേരാവൂരില് മാലിന്യ നിക്ഷേപത്തില് നിന്ന് ആദിവാസി കുട്ടികള് ഭക്ഷണം കഴിച്ച സംഭവം കാസര്കോട്ടെ പ്രസംഗത്തില് പരാമര്ശിച്ചതിന് പ്രധാനമന്ത്രി നരേന്ദ്രമോദിക്കെതിരെ ആരോപണവുമായി രംഗത്തെത്തിയ മുഖ്യമന്ത്രി ഉമ്മന്ചാണ്ടി മലര്ന്ന് കിടന്ന് തുപ്പുന്നു. ഈ വിഷയത്തില് പ്രധാനമന്ത്രി കേരളത്തെ അപമാനിച്ചെന്നും വാര്ത്ത പിന്വലിക്കണമെന്നുമാണ് ഉമ്മന്ചാണ്ടിയുടെ നിര്ദ്ദേശം.
എന്നാല് പേരാവൂര് പഞ്ചായത്തിലെ തിരുവോണപ്പുറത്തെ ട്രെഞ്ചിംഗ് ഗ്രൗണ്ടില് നിക്ഷേപിക്കുന്ന മാലിന്യകൂമ്പാരത്തില്വന്ന് ഭക്ഷണം ശേഖരിച്ച് കഴിക്കാന് അമ്പലക്കുഴി കോളനിയില് നിന്നുള്ള കുട്ടികളാണ് വന്നിരുന്നത്. അരകിലോമീറ്ററോളം ദൂരം നടന്നാണ് കോളനിയില് നിന്ന് കുട്ടികള് സ്ഥിരമായി പഞ്ചായത്ത് വിലക്കെടുത്ത ട്രെഞ്ചിംഗ് ഗ്രൗണ്ടില് വന്ന് മാലിന്യങ്ങളില് നിന്നും ഭക്ഷണം കഴിച്ചിരുന്നത്. പേരാവൂര് പഞ്ചായത്തിലെ വിവിധ ഭാഗങ്ങളില് നിന്നുള്ള മാലിന്യമാണ് ഇവിടെ തള്ളിയിരുന്നത്. സംഭവം മാധ്യമങ്ങളില് ചിത്രസഹിതം പുറത്ത്വന്നതോടെയാണ് മാലിന്യശേഖരത്തില് നിന്നുള്ള ആദിവാസി കുട്ടികളുടെ ഭക്ഷണം ശേഖരിക്കല് പുറംലോകമറിഞ്ഞത്.
പേരാവൂര് പഞ്ചായത്തിലെ 9, 13 വാര്ഡുകളില് ഉള്പ്പെട്ടതാണ് അമ്പലക്കുഴി കോളനി. ഇതില് ഒമ്പതാം വാര്ഡില് കോണ്ഗ്രസ് അംഗവും 13ല് സിപിഎം ആംഗവുമാണ് ജനപ്രതിനിധി. പേരാവൂര് നിയോജകമണ്ഡലത്തില് കഴിഞ്ഞതവണ എംഎല്എ സിപിഎമ്മിലെ കെ.കെ.ശൈലജയായിരുന്നു. 2011ല് തെരഞ്ഞെടുക്കപ്പെട്ടത് കോണ്ഗ്രസിലെ സണ്ണി ജോസഫാണ്.
മാലിന്യ നിക്ഷേപത്തില്നിന്നുള്ള ആദിവാസി കുട്ടികളുടെ ഭക്ഷണ ശേഖരണം പുറത്തായത് ഇരുമുന്നണികള്ക്കും ശക്തമായ പ്രഹരമാണ് ഏല്പിച്ചിരുന്നത്. തെരഞ്ഞെടുപ്പില് ഇത് മറച്ചുവെക്കാനാണ് മുഖ്യമന്ത്രി ഇപ്പോള് ഇതേകുറിച്ച് പ്രസംഗിച്ച പ്രധാനമന്ത്രി നരേന്ദ്രമോദിക്കെതിരെ ആരോപണവുമായി രംഗത്തെത്തിയിരിക്കുന്നത്.
ബിജെപി സംസ്ഥാന അധ്യക്ഷന് കുമ്മനം രാജശേഖരന്റെ നേതൃത്വത്തില് നടന്ന ജനമുന്നേറ്റ യാത്രക്കിടെ കുമ്മനം അടക്കമുള്ള നേതാക്കള് കോളനി സന്ദര്ശിച്ചിരുന്നു. കോളനി നിവാസികളുടെ ക്ഷേമത്തിനായി ആരംഭിച്ച പ്രവര്ത്തനങ്ങള്ക്ക് ജനമുന്നേറ്റ യാത്രയില് പങ്കെടുത്ത ബിജെപി ദേശീയ സമിതി അംഗം ശോഭാസുരേന്ദ്രന് തന്റെ സ്വര്ണ്ണവള അഴിച്ചുകൊടുക്കുകയും ചെയ്തിരുന്നു.
