തളിപ്പറമ്പ്: മണല്ക്കടത്ത് വാഹനത്തെ പിന്തുടര്ന്നെത്തിയ പോലീസിനെ കുന്നിന്മുകളില് മിനിലോറി ഉപേക്ഷിച്ച് അപായപ്പെടുത്താന് ശ്രമം. ഇന്നലെ പുലര്ച്ചെ പരിയാരത്താണ് സംഭവം. പൊയില് കുറ്റ്യേരിക്കടവ് ഭാഗത്ത് നിന്ന് പൂഴി കയറ്റി വരികയായിരുന്ന മിനിലോറി പരിയാരം എസ്ഐ കെ.എന്.മനോജിന്റെ നേതൃത്വത്തിലുള്ള സംഘത്തെ കണ്ട ഉടനെ രക്ഷപ്പെടാന് ശ്രമിക്കുകയായിരുന്നു. പോലീസിനെ കണ്ട ഉടനെ അമ്മാനപ്പാറ റോഡിലേക്ക് അമിത വേഗതയില് ലോറി ഓടിച്ചുകയറ്റി. പോലീസ് പിന്തുടരുന്നുണ്ടെന്നു മനസ്സിലാക്കിയതോടെ മിനിലോറി തേറണ്ടി കുളങ്ങോട് റോഡിലെ കുന്നിന് മുകളിലേക്ക് ഓടിച്ചു കയറ്റുകയും ഏറ്റവും മുകളില് എത്തിയതിനു ശേഷം ലോറി ഡ്രൈവറും സഹായിയും പുറത്തേക്ക് ചാടി രക്ഷപ്പെടുകയും ചെയ്തു. മിനിലോറി കുന്നിന് മുകളില് നിന്ന് പിറകോട്ടേക്ക് വരുന്നത് കണ്ട പോലീസ് വാഹനത്തിന്റെ ഡ്രൈവര് രഞ്ചിത്ത് അപകടസാധ്യത മനസ്സിലാക്കി വളരെ കരുതലോടെ വാഹനം ഓടിച്ചത് വന് അപകടം ഒഴിവാക്കുകയായിരുന്നു. പിറകോട്ടേക്ക് വന്ന മിനിലോറി പോലീസ് വാഹനത്തിന് ഇടിക്കാതെ മറിഞ്ഞു. ഏറ്റവും പഴക്കം ചെന്ന മിനിലോറിയാണിത്.കെ എല് 10 സി 636 നമ്പറുള്ള മിനിലോറിക്ക് ഇന്ധന ടാങ്ക് പോലുമില്ല. കന്നാസില് ശേഖരിച്ചു വച്ച ഇന്ധനം പെപ്പ് വഴിയാണ് വാഹനത്തില് ഉപയോഗിച്ചിരുന്നത്.
കഴിഞ്ഞവര്ഷം മെയ് 16 ന് പുലര്ച്ചെ മണല്ക്കടത്ത് സംഘം വധിക്കാന് ശ്രമിച്ച പരിായരം എസ്.ഐ രാജന് ഇപ്പോഴും ചികിത്സയില് കഴിയുകയാണ്. അന്നും രഞ്ചിത്ത് തന്നെയായിരുന്നു പോലീസ് വാഹനം നിയന്ത്രിച്ചിരുന്നത്. മുന് അനുഭവത്തിന്റെ വെളിച്ചത്തില് രഞ്ചിത്ത് നടത്തിയ ഇടപെടലാണ് ഒരു വന് ദുരന്തം ഒഴിവാകാന് കാരണമായത്. മൂര്ഷിദ് എന്നയാളാണ് മണല്ക്കടത്ത് വാഹനം ഓടിച്ചതെന്ന് വ്യക്തമായിട്ടുണ്ട്. മിനിലോറിയുടെ നമ്പര് വ്യാജമാണെന്നാണ് വിവരം.
