വെള്ളറട: മൂവായിരം അടി ഉയരത്തില് മലമുകളിലുള്ള ക്ഷേത്രത്തില് പതിനായിരങ്ങള് പൊങ്കാല അര്പ്പിക്കുന്ന പ്രശസ്തമായ കാളിമല പൊങ്കാല ഇന്ന്. രാവിലെ 10 ന് പണ്ടാര അടുപ്പില് അഗ്നി പകരുന്നതോടെ പൊങ്കാലയ്ക്ക് തുടക്കമാകും. കേരള-തമിഴ്നാട് അതിര്ത്തിയില് നെയ്യാറ്റിന്കര-വിളവന്കോട് താലൂക്കുകളോട് ചേര്ന്ന് വെള്ളറട, കായല് പഞ്ചായത്ത് അതിര്ത്തിയിലാണ് വരമ്പതി എന്ന കാളിമല തീര്ത്ഥാടനകേന്ദ്രം. നിരവധി ചരിത്രസത്യങ്ങള്ക്ക് സാക്ഷ്യം വഹിച്ച കൂനിച്ചി, കൊണ്ടകെട്ടി മലനിരകളില് എട്ടുവീട്ടില് പിള്ളമാരുടെ ആക്രമണത്തെ ഭയന്ന മാര്ത്താണ്ഡവര്മ അഭയം തേടിയിട്ടുള്ളതായി പറയപ്പെടുന്നു. ഈ മലനിരകളിലാണ് കാളിമല സ്ഥിതിചെയ്യുന്നത്. ശാസ്താവും ഭഗവതിയുമാണ് കാളിമലയിലെ പ്രധാന പ്രതിഷ്ഠ. കൂനിച്ചി മലയിലെ ശൂലംകുത്തി അപ്രീല് വനവാസികളുടെ സംരക്ഷണയില് കഴിഞ്ഞിരുന്ന രാജാവിനെ വനവാസി ബാലന്റെ രൂപത്തില് എത്തിയ ശ്രീധര്മ ശാസ്താവ് എട്ടുവീട്ടില്പിള്ളമാരുടെ സംഘത്തെ തോല്പിച്ച് രക്ഷപ്പെടുത്തി.
കൊടുംവേനലിലും ഉറവ വറ്റാത്ത പാറമുകളിലെ കാളീ തീര്ത്ഥമാണ് മറ്റൊരു സവിശേഷത. കൂടാതെ രാവിലെ കതിരാവുകയും ഉച്ചയോടെ നെല്ലായി അസ്തമയത്തിന് മുമ്പ് പഴുത്തുപൊഴിയുകയും ചെയ്യുന്ന നെല്ല് ഇവിടെ ഉണ്ടായിരുന്നതായി പറയപ്പെടുന്നു. അമ്പൂരി നെല്ല് എന്നാണ് ഇതറിയപ്പെട്ടിരുന്നത്. ഏറെ സവിശേഷതകള് ഉള്ള കാളിമലയിലേക്ക് പൊങ്കാലയര്പ്പിക്കാന് എത്തുന്ന ഭക്തജനങ്ങള്ക്ക് ആവശ്യമായ എല്ലാ സൗകര്യങ്ങളും മലമുകളില് തയ്യാറാക്കിയിട്ടുള്ളതായി ആഘോഷ സമിതി അറിയിച്ചു.
