കൊല്ലം: ദുരന്തബാധിതരില് അതിജീവനത്തിന്റെ ആത്മവിശ്വാസം നിറച്ച് കേന്ദ്ര ആരോഗ്യമന്ത്രി ജെ.പി.നദ്ദ. ഇന്നലെ രാവിലെ 9.25ന് ആശ്രാമം ഹെലിപാഡില് വന്നിറങ്ങിയ ജെ.പി.നദ്ദ ആദ്യം പോയത് പരവൂരിലെ ദുരന്തഭൂമിയിലേക്കായിരുന്നു. ദുരന്തഭൂമിയില് അദ്ദേഹത്തിന്റെ വരവറിഞ്ഞ് എന്.കെ.പ്രേമചന്ദ്രന് എംപിയും എത്തിയിരുന്നു.
പുറ്റിങ്ങലില് എത്തിച്ചേര്ന്ന അദ്ദേഹം ദുരന്തത്തിന്റെ വിശദവിവരങ്ങള് ചാത്തന്നൂര് മണ്ഡലത്തിലെ ബിജെപി സ്ഥാനാര്ത്ഥിയായ ബി.ബി.ഗോപകുമാറില് നിന്നും ചോദിച്ചറിഞ്ഞു. ബിജെപി ജില്ലാ പ്രസിഡന്റ് ജി.ഗോപിനാഥ്, സംസ്ഥാന വൈസ് പ്രസിഡന്റ് ബി.രാധാമണി, ദക്ഷിണമേഖലാ ജനറല് സെക്രട്ടറി എം.എസ്.ശ്യാംകുമാര്, ജില്ലാ ജനറല്സെക്രട്ടറി സുജിത് സുകുമാരന്, ആര്എസ്എസ് പ്രാന്തീയ സഹസമ്പര്ക്കപ്രമുഖ് രാജന്കരൂര്, വിഭാഗ് കാര്യകാരി സദസ്യന് വി.മുരളീധരന്, ജില്ലാ വൈസ്പ്രസിഡന്റുമാരായ അഡ്വ.ജി.ഗോപകുമാര്, എസ്.ദിനേശ്കുമാര്, ദേവകിയമ്മ, ജില്ലാ സെക്രട്ടറിമാരായ നെടുമ്പന ഓമനക്കുട്ടന്, ശ്രീനാഗേഷ്, മെഡിക്കല്സെല് ജില്ലാ കണ്വീനര് ഡോ.സി.എസ്.സാജന്, തെരഞ്ഞെടുപ്പ് കമ്മിറ്റി അംഗങ്ങളായ കെ.നരേന്ദ്രന്, അമ്മച്ചിവീട് അജിത് എന്നിവര് അടങ്ങിയ സംഘവും അദ്ദേഹത്തിനൊപ്പം ഉണ്ടായിരുന്നു.
ദുരന്തഭൂമിയില് തകര്ന്ന ഗുരുമന്ദിരവും എസ്എന്ഡിപി ശാഖാ മന്ദിരവും സന്ദര്ശിച്ച കേന്ദ്രമന്ത്രിയും അദ്ദേഹത്തിനൊപ്പമുണ്ടായിരുന്ന സുരേഷ്ഗോപിയും നേരെ പോയത് ക്ഷേത്രത്തിന് സമീപം താമസിക്കുന്ന പങ്കജാക്ഷിയമ്മയുടെ വീട്ടിലേക്കാണ്. അവിടെ തകര്ന്ന ഉള്ഭാഗവും മറ്റും വീക്ഷിച്ച ശേഷം പങ്കജാക്ഷിയും കുടുംബവും ഉന്നയിച്ച ആവലാതികള് ശ്രവിച്ചാണ് കേന്ദ്രമന്ത്രി മടങ്ങിയത്. പരവൂരില് നിന്നും നേരെ കുറുമണ്ടല് ബി വടക്കുംഭാഗത്ത് കൃഷ്ണവിലാസത്തിലാണ് കേന്ദ്രമന്ത്രിയെത്തിയത്.
പ്രധാനറോഡില് വാഹനമിറങ്ങിയശേഷം അരകിലോമീറ്ററോളം കാല്നടയായാണ് കേന്ദ്രമന്ത്രി ഇവിടേക്ക് എത്തിയത്. അവിടെ വീട്ടുടമയായ ബെന്സിയുടെയും ഭാര്യ ബേബിഗിരിജയുടെയും വിയോഗത്തില് തളര്ന്നുപോയ മക്കളെ അദ്ദേഹം ആശ്വസിപ്പിച്ചു. ദുരന്തസ്ഥലത്ത് ചായക്കച്ചവടം നടത്തുന്നതിനിടെയാണ് ദമ്പതികള് അപകടത്തില്പെട്ടത്. പിന്നീട് കൊട്ടിയം ഹോളിക്രോസ് ആശുപത്രിയിലും കേന്ദ്രമന്ത്രി എത്തി. അവിടെ ചികിത്സയില് കഴിയുന്ന 47 പേരില് കഴിയാവുന്നത്രയും പേരെ നേരില് സന്ദര്ശിച്ച അദ്ദേഹം ചികിത്സാവിവരങ്ങള് ചോദിച്ചറിഞ്ഞു. മെച്ചപ്പെട്ട ചികിത്സക്കായി കേന്ദ്രസര്ക്കാരിന്റെ സഹായവും അദ്ദേഹം ഉറപ്പുനല്കി. ഗുരുതരമായി പൊള്ളലേറ്റ് മെഡിക്കല് ഐസിയുവില് കിടക്കുന്നവരുടെ വിവരങ്ങള് ഡോക്ടര്മാരില് നിന്നും ചോദിച്ചറിഞ്ഞ കേന്ദ്രമന്ത്രി പിന്നീട് കൊല്ലത്തേക്ക് പുറപ്പെട്ടു. ആശ്രാമം മൈതാനിയിലെ ഹെലിപാഡില് നിന്നും 12 മണിയോടെ അദ്ദേഹം തിരുവനന്തപുരത്തേക്ക് തിരിച്ചു.
