ആലപ്പുഴ: പാല്‍പ്പായസത്തിന്റെ നാടായ അമ്പലപ്പുഴയില്‍ നടക്കുന്നത് ശക്തമായ ത്രികോണ മത്സരം. അച്യുതാനന്ദന്റെ സ്വന്തം നാട്ടില്‍ അദ്ദേഹത്തെ അനുകൂലിക്കുന്നവരുടെ സ്വാധീനം അളക്കുന്ന പോരാട്ടമാണ് ഇത്തവണ നടക്കുന്നത്. അച്യുതാനന്ദനെ അധിക്ഷേപിച്ചവര്‍ക്ക് തിരിച്ചടി ലഭിക്കുമോ, അതോ വിഎസിന്റെ സ്വാധീനം എന്ന് പറയുന്നത് ഊതിവീര്‍പ്പിച്ച വെറും സോപ്പുകുമിള മാത്രമാണോ ?. ഉത്തരം ലഭിക്കാന്‍ അടുത്ത മാസം 19 വരെ കാത്തിരിക്കണം. അടിസ്ഥാന ജനവിഭാഗങ്ങളെ തഴഞ്ഞ് വന്‍ കെട്ടിടങ്ങള്‍ നിര്‍മ്മിക്കുന്നതും, വലിയ പ്രഖ്യാപനങ്ങള്‍ നടത്തുന്നതുമാണ് വികസനമെന്ന് കരുതുന്നവര്‍ക്കും, വര്‍ഗീയത മാത്രം മാനദണ്ഡമാക്കി സീറ്റ് വിഭജനം നടത്തിയവര്‍ക്കും, കുപ്രചരണങ്ങള്‍ നടത്തി വര്‍ഗീയ പ്രീണനം നടത്തുന്നവര്‍ക്കും ശക്തമായ താക്കീത് ഇത്തവണ ജനം നല്‍കുമെന്നാണ് വിലയിരുത്തല്‍.
തീരവാസികളോടുള്ള കടുത്ത അവഗണന, കാര്‍ഷിക മേഖലയുടെ തകര്‍ച്ച, മത്സ്യത്തൊഴിലാളികളുടെ ദുരിതം, നാടിന്റെ ജീവനാഡിയായ കാക്കാഴം കാപ്പിത്തോടിന്റെ പതിറ്റാണ്ടുകളായുള്ള ദുരവസ്ഥ, തകര്‍ന്ന റോഡുകള്‍ ഇങ്ങനെ എണ്ണിയാലൊടുങ്ങാത്ത വിഷയങ്ങളാണ് തെരഞ്ഞെടുപ്പ് ചര്‍ച്ചയാകുന്നത്. ബിജെപി അമ്പലപ്പുഴ നിയോജക മണ്ഡലം പ്രസിഡന്റും, പുന്നപ്ര വടക്കു ഗ്രാമപഞ്ചായത്തംഗവുമായ എല്‍. പി. ജയചന്ദ്രനാണ് എന്‍ഡിഎ സ്ഥാനാര്‍ത്ഥി. നിലവിലെ എംഎല്‍എ ജി. സുധാകരന് എല്‍ഡിഎഫിനായി ഹാട്രിക് വിജയം തേടി ഇറങ്ങുന്നു. ജനതാദള്‍-യു സംസ്ഥാന ജനറല്‍ സെക്രട്ടറി ഷെയ്‌ക്ക് പി. ഹാരീസാണ് യുഡിഎഫ് സ്ഥാനാര്‍ത്ഥി.
പറവൂര്‍ പെരുമ്പാറയില്‍ എല്‍. പി. ജയചന്ദ്രന്‍ ആര്‍എസ്എസിലൂടെയാണ് പൊതുപ്രവര്‍ത്തന രംഗത്തെത്തിയത്. പറവൂര്‍ ശാസ്താങ്കല്‍ ശാഖാ മുഖ്യശിക്ഷക്, പുന്നപ്ര മണ്ഡല്‍ കാര്യവാഹ്, താലൂക്ക് ശാരീരിക് ശിക്ഷണ്‍ പ്രമുഖ്, താലൂക്ക് സഹകാര്യവാഹ്, താലൂക്ക് കാര്യവാഹ്, ജില്ലാശാരീരിക് ശിക്ഷണ്‍ പ്രമുഖ്, ബിജെപി അമ്പലപ്പുഴ നിയോജക മണ്ഡലം സംഘടനാ സെക്രട്ടറി എന്നീ ചുമതലകള്‍ വഹിച്ചിട്ടുണ്ട്. നിലവില്‍ ബിജെപി നിയോജക മണ്ഡലം പ്രസിഡന്റും, പുന്നപ്ര വടക്ക് പഞ്ചായത്ത് അഞ്ചാം വാര്‍ഡംഗവുമാണ്. നിരവധി ജനകീയ പ്രക്ഷോഭങ്ങള്‍ക്ക് നേതൃത്വം നല്‍കിയിട്ടുള്ള ജയചന്ദ്രന്‍ മികച്ച സംഘാടകനുമാണ്. പറവൂര്‍ ഭഗവതിക്കല്‍ ക്ഷേത്രയോഗം പ്രസിഡന്റായി പ്രവര്‍ത്തിച്ചിട്ടണ്ട്. റെഡ്‌ക്രോസ് ആജീവനാന്ത അംഗവുമാണ്.
പത്തുവര്‍ഷമായി എംഎല്‍എയായ ജി. സുധാകരന് കഴിഞ്ഞ വിഎസ് സര്‍ക്കാരില്‍ ദേവസ്വം, സഹകരണ മന്ത്രിയായി പ്രവര്‍ത്തിച്ചിട്ടുണ്ട്. എസ്എഫ്‌ഐയുടെ ആദ്യപ്രസിഡന്റായിരുന്ന സുധാകരന് സിപിഎം ജില്ലാസെക്രട്ടറി ചുമതലയും വഹിച്ചിട്ടുണ്ട്. നിലവില്‍ സിപിഎം സംസ്ഥാന കമ്മറ്റിയംഗമാണ്. ആലപ്പുഴ നഗരസഭാ പ്രതിപക്ഷ നേതാവ്, ജില്ലാ കൗണ്‍സില്‍ പ്രസിഡന്റ്, കേരള സര്‍വകലാശാല സെനറ്റ് അംഗം തുടങ്ങിയ നിലയില്‍ പ്രവര്‍ത്തിച്ചിട്ടുണ്ട്. ഒന്‍പതോളം കവിതാ സമാഹാരങ്ങള്‍ പ്രസിദ്ധീകരിച്ചിട്ടുണ്ട്. സിപിഎമ്മിലെ കടുത്ത വിഭാഗീയതയും, സ്ഥാനാര്‍ത്ഥി നിര്‍ണയത്തില്‍ ജില്ലയില്‍ വിഎസ് പക്ഷക്കാരെ വെട്ടിനിരത്തിയതും ഒക്കെ ഇത്തവണത്തെ പ്രധാന ചര്‍ച്ചാവിഷയമാകുന്നതും നിരവധി വര്‍ഷങ്ങളായുള്ള മണ്ഡലത്തിലെ വികസന മുരടിപ്പും സുധാകരന് വെല്ലുവിളിയാണ്.
കേരള വിദ്യാര്‍ത്ഥി ജനത സംസ്ഥാന പ്രസിഡന്റ്, യുവജനതാദള്‍ സംസ്ഥാന പ്രസിഡന്റ് എന്നീ ചുമതലകള്‍ വഹിച്ചിട്ടുള്ള ഷെയ്‌ക്ക് പി. ഹാരീസ് നിലവില്‍ ജനതാദള്‍ സംസ്ഥാന ജനറല്‍ സെക്രട്ടറിയാണ്. കായംകുളം നഗരസഭാ ചെയര്‍മാന്‍, സംസ്ഥാന യുവജനക്ഷേമ ബോര്‍ഡംഗം, കേരളാ ഓട്ടോമൊബൈല്‍സ് ലിമിറ്റഡ് ചെയര്‍മാന്‍, ഓയില്‍പാം ഇന്ത്യാ ലിമിറ്റഡ് ചെയര്‍മാന്‍ തുടങ്ങിയ നിലകളിലും പ്രവര്‍ത്തിച്ചിട്ടുണ്ട്. ഡിസിസി പ്രസിഡന്റ് അടക്കമുള്ള പ്രമുഖ കോണ്‍ഗ്രസ് നേതാക്കള്‍ മത്സരിക്കാനുറച്ചിരുന്ന അമ്പലപ്പുഴയില്‍ ഏറെ സമ്മര്‍ദ്ദങ്ങള്‍ക്കൊടുവലാണ് ജനതാദളിന് സീറ്റ് ലഭിച്ചത്. കാലങ്ങളായി കോണ്‍ഗ്രസ് മത്സരിക്കുകയും പലതവണ വിജയിക്കുകയും ചെയ്തിട്ടുള്ള മണ്ഡലം ഘടക കക്ഷിക്ക് വിട്ടു നല്‍കേണ്ടി വന്നതിലെ പ്രതിഷേധം ഇപ്പോഴും കോണ്‍ഗ്രസ് അമികളിലും, നേതാക്കളിലും അവസാനിച്ചിട്ടില്ല.
