കൊട്ടാരക്കര: വികസനം ആഗ്രഹിക്കുന്ന കേരളത്തിലെ ബഹുഭൂരിപക്ഷം ജനങ്ങളും ഇത്തവണ എന്ഡിഎക്ക് അനുകൂലമായി വോട്ട് ചെയ്യുമെന്നും എന്ഡിഎ ഇത്തവണ അധികാരത്തിലെത്തുമെന്നും പത്തനാപുരത്തെ എന്ഡിഎ സ്ഥാനാര്ത്ഥിയും ചലച്ചിത്രതാരവുമായ ഭീമന്രഘു പറഞ്ഞു. കൊട്ടാരക്കരയില് എന്ഡിഎ സ്ഥാനാര്ത്ഥി രാജേശ്വരി രാജേന്ദ്രന്റെ തെരഞ്ഞെടുപ്പ് കമ്മറ്റി ഓഫിസ് ഉദ്ഘാടനം ചെയ്യുകയായിരുന്നു അദ്ദേഹം.
ഇരുമുന്നണികളും വികസനത്തെപ്പറ്റി സംസാരിക്കാതെ വ്യക്തികേന്ദ്രീകൃത ആരോപണത്തിലേക്കും വിവാദത്തിലേക്കും നീങ്ങുകയാണ്. എന്ഡിഎ രേഖാമൂലം ഉന്നയിക്കുന്ന കുടിവെള്ളം, വികസനം, അടിസ്ഥാനസൗകര്യങ്ങളില്ലായ്മ എന്നിവയെ കുറിച്ച് മറുപടി പറയാതിരിക്കാന് വേണ്ടിയാണ് ഈ ഒളിച്ചോട്ടം. പത്തനാപുരത്തെ അനുഭവം മാത്രം മതി ജനങ്ങളുടെ കേരളത്തിലെ ദുരിതത്തിന്റെ ആഴം മനസിലാക്കാനെന്നും രഘു പറഞ്ഞു.
ബിജെപി ജില്ലാപ്രസിഡന്റ് ജി.ഗോപിനാഥ് മുഖ്യപ്രഭാഷണം നടത്തി. കൊട്ടാരക്കരയിലെ ബിജെപിയുടെ മുന്നേറ്റത്തിന് തടയിടാന് പോലീസും കോണ്ഗ്രസും സിപിഎമ്മും കൂടി ആസൂത്രണം ചെയ്ത കള്ളക്കഥയാണ് പോലീസ് സ്റ്റേഷന് ആക്രമണമെന്ന് അദ്ദേഹം പറഞ്ഞു. പ്രവര്ത്തകരേയും നേതാക്കളെയും തെരഞ്ഞെടുപ്പില് നിന്ന് അകറ്റുകയും ജനങ്ങളില് ഭീതി പരത്തുകയും ആയിരുന്നു ലക്ഷ്യം. എന്നാല് സംഘപരിവാര് സംഘടനകളെ കുറിച്ച് അറിയാവുന്ന ജനങ്ങള് ഇതിനെ പുച്ഛിച്ച് തള്ളിക്കളഞ്ഞു. ജില്ലയില് ബിജെപി ഇത്തവണ അത്ഭുതങ്ങള് സൃഷ്ടിക്കുമെന്നും അദ്ദേഹം പറഞ്ഞു.
നിയോജകമണ്ഡലം പ്രസിഡന്റ് സി. വിജയകുമാര് അദ്ധ്യക്ഷനായിരുന്നു. ആര്എസ്എസ് വിഭാഗ് കാര്യവാഹ് വി. പ്രതാപന്, ബിജെപി ജില്ലാ ജനറല്സെക്രട്ടറി അഡ്വ.പി. അരുള്, സെക്രട്ടറി വയയ്ക്കല് സോമന്, മണ്ഡലം ജനറല്സെക്രട്ടറി മാലയില് അനില്, സ്ഥാനാര്ത്ഥി രാജേശ്വരിരാജേന്ദ്രന്, ആര്എസ്എസ് ജില്ലാസഹകാര്യവാഹ് അനില്കുമാര്, നേതാക്കളായ അഡ്വ. സത്യരാജ്, പ്രകാശ് വിലങ്ങറ, പുലമണ് ശ്രീരാജ്, മൈലംകുളം ഹരി, അണ്ടൂര് രാധാകൃഷ്ണന്, രാജഗോപാല്, കോട്ടാത്തല സന്തോഷ് എന്നിവര് സംസാരിച്ചു.
