മറ്റൊരു നിയമസഭാ തെരഞ്ഞെടുപ്പിന് കേരളം വേദിയാവുകയാണ്. ദേശമൊട്ടും ദേശവിരുദ്ധ ശക്തികള്ക്കെതിരെ ദേശസ്നേഹികള് സംഘടിച്ചു തുടങ്ങിയിരിക്കുന്നു. അതിനുദാഹരണമാണ് ജെഎന്യുവിലും ഹൈദരാബാദിലും ‘കേരള വര്മ’യിലും ഗുരുവായൂരപ്പന് കോളേജിലും ‘വ്യാസ’യിലും മഹാരാജാസിലുമൊക്കെ നടന്നുവരുന്ന ദേശവിരുദ്ധ ശക്തികള്ക്കും സാമൂഹ്യദ്രോഹികള്ക്കുമെതിരായ പോരാട്ടങ്ങള്. എന്തായാലും അണിയറയില് നടന്നുവരുന്ന ഗൂഢാലോചനക്കാരുടെ മുഖംമൂടികള് പിച്ചിചീന്തുവാന് ഈ പോരാട്ടങ്ങള്കൊണ്ട് കഴിഞ്ഞു.
വിദ്യാഭ്യാസ മേഖല അരക്ഷിതമാണെന്ന് സര്ക്കാര് വൈകിയവേളയിലെങ്കിലും മനസ്സിലാക്കാന് തയ്യാറായത് നന്ന്. പഠിക്കാന് വരുന്ന പെണ്കുട്ടികളെ വഴിപിഴപ്പിച്ചു സംസ്കാരത്തെ തന്നെ താറുമാറാക്കുക എന്ന മനസ്സുകളുടെ പ്രവര്ത്തനം പ്രതികരണശേഷി നഷ്ടപ്പെടാത്ത ദേശീയ ജനത തകര്ത്തെറിയുക തന്നെ വേണം. വിദ്യാര്ത്ഥികള്ക്കും വിദ്യാര്ത്ഥിനികള്ക്കും ഭയലേശമെന്യേ പഠിക്കുകയും പഠിപ്പുകഴിഞ്ഞ് സമാധാന ജീവിതം നയിക്കാന് വേണ്ട സാമൂഹികാന്തരീക്ഷം ഉണ്ടാക്കണം.
വിദ്യാര്ത്ഥി സമൂഹത്തിന് അപമാനകരമായ പ്രവര്ത്തനങ്ങള് കാമ്പസുകളില് അരങ്ങേറുമ്പോഴും വ്യഭിചാരം, മദ്യം, മയക്കുമരുന്ന് ദേശവിരുദ്ധ രാഷ്ട്രീയ പ്രവര്ത്തനം, അക്രമങ്ങള്, പഠിപ്പുമുടക്കലുകള് എന്നിവക്കെതിരെ സമാധാനപാലകരായ പോലീസ് സംവിധാനം നിഷ്ക്രിയമാകുന്ന കാഴ്ചയാണ് നാം കാണുന്നത്. എഞ്ചിനീയറിങ്, മെഡിക്കല് കോളേജുകളില് മുന്പ് അരങ്ങേറിയിരുന്ന ‘റാഗിങ്’ എന്ന മനോവിഭ്രാന്തിയുള്ളവരുടെ വഷളന് പ്രക്രിയയിലൂടെ എത്രയെത്ര ജീവനുകളാണ് ഹോമിക്കപ്പെടുന്നത്; എത്രയെത്ര പേര് ജീവച്ഛവമായി!
ഇതുപോലെ നമ്മുടെ നിയമസഭയില് അരങ്ങേറുന്നതും ജനപ്രതിനിധിയെന്ന പ്രത്യേകാനുകൂല്യം നേടി സംരക്ഷിതമേഖലയില് നില്ക്കുന്നവരുടെ സാമൂഹ്യദ്രോഹപ്രവര്ത്തികളല്ലേ? ദേശസ്നേഹമെന്തെന്നും സാമൂഹ്യഭദ്രതയെന്തെന്നും അറിയാത്തവര് ജനപ്രതിനിധികളായാല്, മദനിയെന്ന ഭീകരനെ വിട്ടയ്ക്കാന് കേരള നിയമസഭയില് ഐകകണ്ഠേന പ്രമേയം പാസ്സാക്കാതിരിക്കുമോ? മുസ്ലിമായ മലപ്പുറം ബിജെപി സ്ഥാനാര്ത്ഥിക്കെതിരെ വധഭീഷണി മുഴക്കിയതുപോലെ കേരള നിയമസഭയില് ഐകകണ്ഠേന ദേശദ്രോഹ പ്രമേയം പാസ്സാക്കിയതിനുപിന്നിലും വധഭീഷണി ഉണ്ടായിരുന്നുവോ എന്ന് എന്ഐഎ അന്വേഷിക്കണം. അല്ലെങ്കില് നിയമസഭ ഉടച്ചുവാര്ക്കണം.
സി.ഭരതപിഷാരടി, കൊയിലാണ്ടി, കോഴിക്കോട്
