പൂപ്പറമ്പ് പുലയനാര്‍ കാവില്‍ കളിയാട്ട മഹോത്സവം ഇന്ന് തുടങ്ങും

പയ്യാവൂര്‍: ഒരു നൂറ്റാണ്ട് മുമ്പ് കെട്ടിയാടിയ കളിയാട്ട മഹോത്സവം പൂപ്പറമ്പ് പുലയനാര്‍ കാവില്‍ ആഘോഷിക്കുന്നു. പുരാണ ഐതിഹ്യങ്ങളില്‍ പ്രസിദ്ധമായ പുലയനാര്‍ കാവിന്റെ പുരാണ പ്രൗഡി പുതുതലമുറക്ക് അജ്ഞാതമാണ്. ചരിത്രത്തിന്റെ സജീവ സാക്ഷ്യങ്ങളായി മരുതാര്‍പ്പാടിയും പൊടിക്കളവും തുണിയാര്‍ക്കടവും അരമനകളും പൂപ്പറമ്പും എല്ലാം ഇന്നിന്റെ ഓര്‍മ്മകളിലേക്ക് എത്തിക്കുവാന്‍ ഉത്സവാഘോഷങ്ങളുടെ പുനരവതരണം സഹായിക്കും. ഇന്ന് വൈകുന്നേരം 4.30 ന് പൂപ്പറമ്പ് ഭഗവതി ക്ഷേത്രത്തില്‍ നിന്ന് കലവറ നിറക്കല്‍ ഘോഷയാത്ര, 6.20 ന് കലശം, ദൈവത്താറീശ്വരന്‍, നാട്ടുമൂര്‍ത്തി, അറക്കൂര്‍ ചാമുണ്ഡി എന്നിവ നടക്കും, 7.30 ന് നടക്കുന്ന സാംസ്‌കാരിക സമ്മേളനം സംഗീത സംവിധായകന്‍ കൈതപ്രം വിശ്വനാഥന്‍ നമ്പൂതിരി ഉദ്ഘാടനം ചെയ്യും. ഡോ.ലിസി മാത്യു മുഖ്യപ്രഭാഷണം നടത്തും. കണ്ണൂര്‍ വിജിലന്‍സ് സിഐ കെ.വി.ബാബു മുഖ്യാതിഥിയായി പങ്കെടുക്കും. തുടര്‍ന്ന് വിവിധ കലാപരിപാടികളും നടക്കും. നാളെ വൈകുന്നേരം 5 മണി മുതല്‍ തോറ്റങ്ങളും തെയ്യങ്ങളും നടക്കും. രാത്രി 9 മണിക്ക് ചമതച്ചാല്‍ വീരഭദ്ര ക്ഷേത്രത്തില്‍ നിന്ന് കാഴ്ചവരവ് നടക്കും. സമാപന ദിവസമായ 10 ന് രാവിലെ 4 മണിക്ക് പുലികണ്ഠന്‍, പുലിയൂര്‍ കണ്ണന്‍, 8.20 ന് വിഷ്ണുമൂര്‍ത്തി, 10 ന് പുള്ളിക്കരിങ്കാളി, 11 ന് പുലിയൂര്‍ കാളി തെയ്യക്കോലങ്ങള്‍ കെട്ടായാടും.