അടിമാലി: ഏഴുപതിറ്റാണ്ട് മുന്‍പ് നിര്‍മ്മിച്ച കമ്പിളികണ്ടം- കുരിശുകുത്തി- ഇഞ്ചത്തൊട്ടി റോഡ് ഗതാഗത യോഗ്യമാക്കാത്തതില്‍ പ്രതിഷേധിച്ച് ജനകീയ കമ്മിറ്റിയുടെ നേതൃത്വത്തില്‍ പ്രദേശവാസികള്‍ നടത്തിയ ഉപരോധ സമരം അധികൃതര്‍ക്ക് താക്കീതായി. ഇന്നലെ രാവിലെ കമ്പിളികണ്ടം ജഗ്ഷനിലാണ് റോഡ് ഉപരോധ സമരം സംഘടിപ്പിച്ചത്. കുരിശുകുത്തി, ഇഞ്ചത്തൊട്ടി മേഖലയില്‍ നിന്നുള്ള സ്ത്രീകളും കുട്ടികളും അടക്കം നൂറുകണക്കിന് ജനങ്ങളാണ് സമരത്തില്‍ പങ്കെടുത്തത്. വെള്ളത്തൂവല്‍ പോലീസ് സബ് ഇന്‍സ്‌പെക്ടര്‍ എം.വി. വര്‍ഗീസിന്റെ നേതൃത്വത്തിലുള്ള സംഘം സ്ഥലത്ത് നിലയുറപ്പിച്ചിരുന്നു. ജനകീയ സമിതി ഭാരവാഹികളായ രമണിയമ്മ ജി. പിള്ള, രവി കണ്ടറുമറ്റത്തില്‍, എല്‍ദോസ് ചേറാടിയില്‍, റോയി മാനാടിയില്‍ തുടങ്ങിയവര്‍ സമരത്തിന് നേതൃത്വം നല്‍കി. റോഡ് ഗതാകതയോഗ്യമാക്കാത്ത സാഹചര്യത്തില്‍, വരുന്ന തെരഞ്ഞെടുപ്പില്‍ ഒരു രാഷ്‌ട്രീയ പാര്‍ട്ടികള്‍ക്കും വോട്ടു ചെയ്യാതെ വിട്ടു നില്‍ക്കുക, ആയിരക്കണക്കിന് ആളുകള്‍ താമസിക്കുന്ന കുരിശുകുത്തി മേഖലയില്‍ തെരഞ്ഞെടുപ്പു സംബന്ധിച്ചുള്ള ഫ്‌ളെക്‌സ് ബോര്‍ഡുകള്‍ സ്ഥാപിക്കാന്‍ അനുവദിക്കാതിരിക്കുക തുടങ്ങിയ സമര മാര്‍ഗങ്ങളില്‍ തങ്ങള്‍ ഉറച്ചു നില്‍ക്കുകയാണെന്ന് പൊതുജനങ്ങള്‍ പറഞ്ഞു. പതിറ്റാണ്ടുകള്‍ നീണ്ട നിവേദനങ്ങള്‍ക്കും പരാതികള്‍ക്കും ഒടുവില്‍ 2012-ല്‍ ഇടുക്കി പാക്കേജില്‍ ഉള്‍പ്പെടുത്തി രണ്ടു കോടി തൊണ്ണൂറു ലക്ഷം രൂപ അനുവദിച്ചതായി പ്രദേശവാസികളെ നേതാക്കള്‍ ധരിപ്പിച്ചിരുന്നെങ്കിലും നിലപാടില്‍ മാറ്റം വന്നതാണ് ജനങ്ങള്‍ക്കിടയില്‍ പ്രതിഷേധത്തിന് കാരണമായത്. നൂറുകണക്കിന് വിദ്യാര്‍ത്ഥികള്‍ അടക്കം ഉപയോഗിക്കുന്ന റോഡില്‍ മഴക്കാലമാകുന്നതോടെ കാല്‍നടപോലും ദുഷ്‌കരമായ സാഹചര്യത്തിലാണ് പ്രത്യക്ഷ സമരവുമായി ജനങ്ങള്‍ രംഗത്തെത്തിയിട്ടുള്ളത്. ജനങ്ങള്‍ സമരവുമായി രംഗത്തെത്തിയതോടെ ചര്‍ച്ചയ്‌ക്ക് എത്തിയ രാഷ്‌ട്രീയ നേതൃത്വങ്ങളോട്, തങ്ങള്‍ വിട്ടുവീഴ്ചക്കില്ലെന്നും റോഡ് നിര്‍മ്മാണം നടത്തി ലഭിക്കുന്നതു വരെ വോട്ടു ബഹിഷ്‌കരണം അടക്കമുള്ള സമര മാര്‍ഗങ്ങളില്‍ ഉറച്ചു നില്‍ക്കുമെന്ന് നാട്ടുകാര്‍ പറഞ്ഞു.
റോഡ് നന്നാക്കിയില്ല: പ്രദേശവാസികളുടെ ഉപരോധ സമരം താക്കീതായി
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.