കടയടച്ച് മടങ്ങിയ വ്യാപാരിയെ ബൈക്കിലെത്തിയ അക്രമി സംഘം വെട്ടി കൊലപ്പെടുത്തി. കാട്ടാക്കട, ആമച്ചല്, ചന്ദ്രമംഗലം സാനി ഭവനില് ചന്ദ്രന് (63) ആണ് മരിച്ചത്.
ഞായറാഴ്ച രാത്രി 10.45 ന് ആമച്ചല് ജംഷനില് മുറുക്കാന് കട നടത്തുന്ന ചന്ദ്രന് കടയടച്ച് വീട്ടിലേയ്ക്ക് പോകവെയാണ് പുറകെ ബൈക്കിലെത്തിയ മൂന്നംഗ സംഘം ഇയാളെ മാരകമായി വെട്ടിപ്പരിക്കേല്പ്പിച്ചത്.
ബൈക്കിലെത്തിയ മൂന്നംഗ സംഘത്തില് ഒരാള് ആദ്യം ചന്ദ്രനെ ബലമായി പിടിക്കുകയും മറ്റ് രണ്ട് പേര് ഇറങ്ങി വന്ന് വാള് കൊണ്ട് വെട്ടുകയുമായിരുന്നുവെന്നും ആരാണ് വെട്ടിയതെന്ന് അറിയില്ലെന്നും ചന്ദ്രന് ആശുപത്രിയിലേക്ക് കൊണ്ടുപോകും വഴി പറഞ്ഞിരുന്നു.
ആക്രമണത്തില് ചന്ദ്രന്റെ ഇടതുകാല് പൂര്ണമായും വലതുകാലിലും കൈകളിലും കഴുത്തിലും വെട്ടേറ്റിരുന്നു. ചന്ദ്രന്റെ നിലവിളികേട്ട് സമീപവാസികള് ഓടിയെത്തി ഗുരുതരമായി പരിക്കേറ്റ ചന്ദ്രനെ മെഡിക്കല് കോളേജില് പ്രവേശിപ്പിക്കുകയായിരുന്നു. ഇന്നലെ രാവിലെ 9.45 ഓടെ മരണപ്പെടുകയായിരുന്നു.
അക്രമണത്തിന്റെ കാരണമെന്തെന്ന് ഇതുവരെ വ്യക്തമല്ലെന്നും അക്രമികളെപ്പറ്റി സൂചന ലഭിച്ചിട്ടില്ലെന്നും പോലീസ് വ്യക്തമാക്കി. ആളുമാറി നടന്ന കൊലപാതകമാണോ എന്ന സംശയവും നിലനില്ക്കുന്നു. നെടുമങ്ങാട് ഡിവൈഎസ്പി ശിവപ്രസാദിന്റെ നേതൃത്വത്തില് കാട്ടാക്കട പോലീസ് അന്വേഷണം ആരംഭിച്ചു.
മൃതദേഹം പോസ്റ്റ്മോര്ട്ടത്തിന് ശേഷം വീട്ടുവളപ്പില് സംസ്കരിച്ചു. ഗിരിജയാണ് ഭാര്യ. സാനി മകളാണ്. വ്യാപാരി വ്യവസായി ഏകോപന സമിതി കാട്ടാക്കട പഞ്ചായത്തില് കടകളടച്ച് ഹര്ത്താലാചരിച്ചു. സംഭവസ്ഥലത്ത് വന് പോലീസ് സംഘം ക്യാമ്പ് ചെയ്യുന്നുണ്ട്.
ചന്ദ്രനെ വെട്ടിക്കൊലപ്പെടുത്തിയ കേസിലെ പ്രതികളെ കണ്ടെത്താന് പ്രത്യേക അന്വേഷണ സംഘത്തെ നിയോഗിക്കണമെന്നും കുറ്റവാളികളെ ഉടന് പിടികൂടണമെന്നും സ്പീക്കര് എന്.
ശക്തന് മുഖ്യമന്ത്രി, ആഭ്യന്തരമന്ത്രി എന്നിവരോട് ആവശ്യപ്പെട്ടു. സാധാരണക്കാരന്റെ ജീവനും സ്വത്തിനും സംരക്ഷണം നല്കാന് അടിയന്തര നടപടി വേണമെന്നും സ്പീക്കര് പറഞ്ഞു.
