പാനൂര്: പുഷ്പനെ അറിയാമോ? ഞങ്ങടെ പുഷ്പനെ അറിയാമോ? സഖാവിനെ അറിയാമോ? ആ രണഗാഥ അറിയാമോ? ഇതു മൂന്നു വര്ഷം മുന്പ് ചൊക്ലിയിലെ സിപിഎം സഹയാത്രികനായ യുവകവി സവ്യസാചി എഴുതി ഈണം നല്കിയ കൂത്തുപറമ്പിന്റെ ജീവിക്കുന്ന രക്തസാക്ഷി പുഷ്പനെ പ്രകീര്ത്തിച്ച ഗാനത്തിലെ വരികളാണ്. അഴീക്കോട് മണ്ഡലത്തില് എംവി.രാഘവന്റെ മകന് നികേഷിനെ സ്ഥാനാര്ത്ഥിയാക്കാന് സിപിഎം കാണിക്കുന്ന ശുഷ്കാന്തി കാണുമ്പോള് നേതൃത്വത്തിനോടു പാര്ട്ടി അണികള് തന്നെ ചോദിക്കുന്നത് മേല്പറഞ്ഞ വരികള്ത്തന്നെ. 1994 നവംബര് 25 മുതല് കൂത്തുപറമ്പ് വെടിവെപ്പില് ജീവശ്ചവമായ പുഷ്പനെയും മറന്നുകൊണ്ടും അഞ്ച് സഖാക്കളുടെ ജീവത്യാഗത്തെ മറന്നുകൊണ്ടും എംവി.രാഘവന്റെ മകനും മാധ്യമ പ്രവര്ത്തകനുമായ എം.വി.നികേഷ്കുമാറിനെ അഴീക്കോട് സ്ഥാനാര്ത്ഥിയായി അവരോധിക്കാന് അനുമതി നല്കിയതില് വ്യാപകപ്രതിഷേധവും അമര്ഷവുമാണ് സിപിഎം അണികളില് നിന്നുമുയരുന്നത്. സിപിഎം കണ്ണൂര്ജില്ലാ നേതൃത്വത്തിനോട് വിശദീകരണമാവശ്യപ്പെട്ട് ഇന്നലെ ചൊക്ലിയിലെ ഒരുസംഘം സിപിഎം പ്രവര്ത്തകര് അഴീക്കോടന്മന്ദിരത്തിലെത്തി നേരിട്ടു പ്രതിഷേധമറിയിക്കുകയും ചെയ്തു. ചൊക്ലി, നിടുമ്പ്രം, ചമ്പാട് ഭാഗങ്ങളിലെ നേതാക്കളാണ് പ്രതിഷേധവുമായി നേതൃത്വത്തെ കണ്ടത്. കൂത്തുപറമ്പില് പിടഞ്ഞുവീണവരോടും പുഷ്പനോടും കാണിക്കുന്ന ആത്മവഞ്ചന വെച്ചുപൊറുപ്പിക്കില്ലെന്നും നികേഷിന്റെ സ്ഥാനാര്ത്ഥിത്വം അംഗീകരിക്കില്ലെന്നുമുളള ഉറച്ച നിലപാടിലാണ് ഒരു വിഭാഗം പ്രവര്ത്തകര്. വേദന കടിച്ചമര്ത്തി പ്രസ്ഥാനം നടത്തിയ സമരമുഖത്തെ ആവേശത്തില് ഇന്നും ജീവിക്കുന്ന പുഷ്പനെ മറന്നാണ് വെടിവെക്കാന് ഉത്തരവ് നല്കിയെന്ന് സിപിഎമ്മുകാര് തന്നെ ആരോപിച്ച എംവി.രാഘവന്റെ മകനെ അഴീക്കോട്ട് അവരോധിക്കാന് സിപിഎം ശ്രമിക്കുന്നത്. ഇത്തരം നീക്കം ജില്ലയില്ത്തന്നെയാകുമ്പോള് സഹിക്കാന് യഥാര്ത്ഥ കമ്യൂണിസ്റ്റുകാര്ക്ക് കഴിയില്ലെന്നതാണ് സാരം. സവ്യസാചി പുഷ്പനു വേണ്ടി എഴുതിയ വരികള് ഇപ്പോള് സിപിഎം നേതൃത്വത്തിനുളള ഒളിയമ്പായി കാലാന്തരത്തില് പരിണമിച്ചിരിക്കുകയാണ്.
അഴീക്കോട് മണ്ഡലത്തില് എംവി.രാഘവന്റെ മകന് നികേഷിന്റെ സ്ഥാനാര്ത്ഥിത്വം : പുഷ്പനെ അറിയാമോയെന്ന ചോദ്യവുമായി ഡിഫിക്കാര്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.