ന്യൂദല്ഹി: കേന്ദ്രസര്ക്കാര് ജീവനക്കാരുടെ ക്ഷാമബത്ത(ഡി.എ) 125 ശതമാനമാക്കി ഉയര്ത്തി കേന്ദ്രമന്ത്രിസഭാ തീരുമാനം. ഒറ്റയടിക്ക് ആറ് ശതമാനത്തിന്റെ വര്ദ്ധനവാണ് കേന്ദ്രസര്ക്കാര് പ്രഖ്യാപിച്ചത്. സര്ക്കാര് ജീവനക്കാര്ക്കും പെന്ഷന്കാര്ക്കുമടക്കം 1.08 കോടി പേര്ക്ക് പ്രയോജനകരമാണ് പുതിയ തീരുമാനം. പ്രതിവര്ഷം 14,725.74 കോടി രൂപയുടെ അധിക സാമ്പത്തിക ബാധ്യത വരുന്ന തീരുമാനമാണിത്.
അടിസ്ഥാന ശമ്പളത്തിന്റെ 119 ശതമാനമാണ് നിലവില് കേന്ദ്രസര്ക്കാര് ജീവനക്കാര്ക്കും പെന്ഷന്കാര്ക്കും ലഭിക്കുന്ന ക്ഷാമബത്ത. ഹോളി-ഈസ്റ്റര് സമ്മാനമായി ക്ഷാമബത്തയില് അപ്രതീക്ഷിത വര്ദ്ധനവ് വരുത്തിയ കേന്ദ്രസര്ക്കാര് തീരുമാനം ജീവനക്കാരെ അത്ഭുതപ്പെടുത്തി. 50 ലക്ഷം ജീവനക്കാര്ക്കും 58 ലക്ഷം പെന്ഷന്കാര്ക്കും തീരുമാനത്തിന്റെ പ്രയോജനം ലഭിക്കും. കഴിഞ്ഞ സപ്തംബറിലും 6 ശതമാനത്തിന്റെ വര്ദ്ധനവ് ഡി.എയില് വരുത്തിയിരുന്നു.
2016 ജനുവരി 1 മുതല് മുന്കാല പ്രാബല്യത്തോടെ വര്ദ്ധിപ്പിച്ച ഡി.എ ജീവനക്കാര്ക്ക് നല്കുമെന്നും കേന്ദ്രസര്ക്കാര് വ്യക്തമാക്കിയിട്ടുണ്ട്. ക്ഷാമബത്ത വര്ദ്ധിപ്പിച്ചതോടെ പ്രതിവര്ഷം 6796.50 കോടി രൂപ സര്ക്കാര് ജീവനക്കാര്ക്കു വേണ്ടിയും 7929.24 കോടി രൂപ പെന്ഷന്കാര്ക്കു വേണ്ടിയും അധികമായി വകയിരുത്തേണ്ടിവരും.
പ്രധാനമന്ത്രി നരേന്ദ്രമോദിയുടെ അധ്യക്ഷതയില് ചേര്ന്ന കേന്ദ്രമന്ത്രിസഭായോഗത്തില് ആറാം ശമ്പളകമ്മീഷന്റെ ശുപാര്ശകള്ക്കുള്ള അംഗീകാരമായാണ് തീരുമാനം എടുത്തത്. പൊതുബജറ്റില് 7-ാം ശമ്പളകമ്മീഷന് ശുപാര്ശകള് നടപ്പാക്കുമെന്നും കേന്ദ്രസര്ക്കാര് പ്രഖ്യാപിച്ചിരുന്നു. അവശ്യസാധനങ്ങളുടെ വിലവര്ദ്ധനവ് മറികടക്കുന്നതിനായാണ് ഡി.എയില് വര്ദ്ധനവ് നല്കുന്നത്.
