പേട്ട: അമല്കൃഷ്ണയുടെ ദീര്ഘായുസ്സിന് അമ്മ ജയശ്രീ കരിക്കകത്തമ്മയ്ക്ക് പൊങ്കാലയര്പ്പിച്ചു. ബിജെപി സേവാഭാരതി പ്രവര്ത്തകരുടെ സാന്നിദ്ധ്യത്തിലാണ് ക്ഷേത്രമുറ്റത്ത് പൊങ്കാലയര്പ്പിച്ചത്.
കാട്ടായിക്കോണത്ത് സിപിഎം ഗുണ്ടകള് നടത്തിയ ആക്രമണത്തിലാണ് ചങ്ങനാശേരി പെരുന്ന സുമശ്രീ വീട്ടില് അമല്കൃഷ്ണ ഗുരുതരമായി പരിക്കേറ്റ് കിംസ് ആശുപത്രിയില് ചികിത്സയില് കഴിയുന്നത്. തലയിലേറ്റ മാരകമായ ആഘാതത്തില് ഹൃദയവുമായി ബന്ധപ്പെട്ട ഞരമ്പിന് ക്ഷതം സംഭവിച്ചതിനെതുടര്ന്ന് തലച്ചോറില് നടത്തിയ ശസ്ത്രക്രിയയിലൂടെ അമലിന് നേരിയതോതില് പുരോഗതി വരുന്നതായി ആശുപത്രി അധികൃതര് പറയുന്നു. ഇപ്പോള് പരീക്ഷണാടിസ്ഥാനത്തില് ഐസിയുവില് നിന്നും പുറത്തെ അന്തരീക്ഷവുമായി യോജിക്കുവാന് വേണ്ടി ഇടയ്ക്കിടെ വാര്ഡിലേക്ക് മാറ്റുകയും സമയക്രമം അനുസരിച്ച് തിരികെ ഐസിയുവിലേക്ക് മാറ്റുകയും ചെയ്യുന്ന പ്രക്രിയയും നടന്നുവരികയാണ്. പഴയ ജീവിതക്രമത്തിലേക്ക് അമല്കൃഷ്ണയെ തിരികെ കൊണ്ടുവരാന് സാധിക്കുമെന്ന പ്രതീക്ഷയിലാണ് ആശുപത്രി അധികൃതരും ബന്ധുക്കളും സംഘപ്രവര്ത്തകരും.
രാവിലെ 9 ഓടെ അമല്കൃഷ്ണയുടെ അമ്മ ക്ഷേത്രത്തിലെത്തി. പണ്ടാരയടുപ്പിനടുത്താണ് അമല്കൃഷ്ണയ്ക്ക് വേണ്ടിയുള്ള പൊങ്കാലയടുപ്പും സജ്ജമാക്കിയിരുന്നത്. പണ്ടാരയടുപ്പില്നിന്നു പകര്ന്നു അഗ്നി തന്റെ അടുപ്പിലേക്ക് പകര്ന്നപ്പോള് ജയശ്രീയുടെ കണ്ണുകള് നിറഞ്ഞു. ആദ്യമായിട്ടാണ് കരിക്കകത്ത് എത്തുന്നത്. എല്ലാം അറിയുന്ന അമ്മ തന്റെ മകനെയും തിരിച്ചുതരുമെന്ന് ജയശ്രീ പറഞ്ഞു.
