കുന്നത്തൂര്: വീട്ടമ്മയെ ഊരുവിലക്കി ഡിവൈഎഫ്ഐ പ്രവര്ത്തകര്. മൈനാഗപ്പള്ളി ആറ്റുംപുറത്താണ് സംഭവം. ആറ്റുംപുറത്ത് വാടകവീട്ടില് താമസിക്കുന്ന ഷൈനാമോളെയാണ് ഡിവൈഎഫ്ഐ ഏരിയാസെക്രട്ടറിയുടെ നേതൃത്വത്തിലുള്ള സംഘം വീട്ടില് കയറാന് അനുവദിക്കാതെ ഊരുവിലക്കിയിരിക്കുന്നത്. ഇത് സംബന്ധിച്ച് ഇവര് ഏരിയാസെക്രട്ടറി മനോജ് ഉള്പ്പടെയുള്ള പതിമൂന്നാംഗ സിപിഎം-ഡിവൈഎഫ്ഐ പ്രവര്ത്തകര്ക്കെതിരെ ശാസ്താംകോട്ട പോലീസില് പരാതി നല്കിയിട്ടുണ്ട്.
കഴിഞ്ഞ 18നായിരുന്നു സംഭവം. ഷൈനമോള് വാടകവീട്ടില് നിന്നും ഉത്സവത്തിനായി ജ്യേഷ്ഠത്തിയുടെ വീട്ടില് പോയി തിരികെവന്നപ്പോള് വീട് പൂര്ണമായും തകര്ത്ത നിലയില് കാണപ്പെടുകയായിരുന്നു. തുടര്ന്ന് സമീപത്ത് അന്വേഷിച്ചപ്പോഴാണ് ഡിവൈഎഫ്ഐ പ്രവര്ത്തകര് വീട് അടിച്ചുതകര്ത്തതറിഞ്ഞത്. തുടര്ന്നാണ് ശാസ്താംകോട്ട പോലീസില് പരാതി നല്കിയതും.
ജ്യേഷ്ഠത്തിയുടെ മകന് ഡിവൈഎഎഫ്ഐ പ്രവര്ത്തകരെ മര്ദ്ദിച്ചുവെന്നാരോപിച്ചായിരുന്നു അക്രമമെന്ന് ഷൈനാമോള് പോലീസില് നല്കിയ പരാതിയില് പറയുന്നു. ഇവിടെ താമസിക്കാന് അനുവദിക്കില്ലെന്നും ജംഗ്ഷനില് പോലും കണ്ടു പോകരുതെന്നാണ് ഡിവൈഎഫ്ഐ-സിപിഎം പ്രവര്ത്തകര് ഷൈനാമോളിന് നല്കിയിരിക്കുന്ന അന്ത്യശാസനം. ഉത്സവത്തിനിടെയുണ്ടായ സംഘര്ഷത്തിന്റെ പേരിലാണ് അതില് യാതൊരുബന്ധവുമില്ലാത്ത തന്നെ സിപിഎം പ്രവര്ത്തകര് ആക്രമിക്കുന്നതെന്നും തനിക്കും കുട്ടികള്ക്കും എന്തെങ്കിലും സംഭവിച്ചാല് അതിന്റെ പൂര്ണ ഉത്തരവാദിത്തം സിപിഎം-ഡിവൈഎഫ് പ്രവര്ത്തകര്ക്കായിരിക്കുമെന്ന് ഷൈനാമോള് പോലീസ് മേധാവിക്ക് നല്കിയിരിക്കുന്ന പരാതിയില് പറയുന്നു.
