നാഗ്പൂര്: ട്വന്റി20 ലോകകപ്പില് ന്യൂസിലാന്ഡിനെതിരെ 47 റണ്സിന് തോറ്റതിന് ഇന്ത്യന് നായകന് എം.എസ്. ധോണിയുടെ പഴി ബാറ്റ്സ്മാന്മാര്ക്ക്. ചെറിയ സ്കോറില് അവരെ പിടിച്ചുനിര്ത്താന് സാധിച്ചെങ്കിലും അത് പിന്തുടരാന് ബാറ്റസ്മാന്മാര്ക്ക് സാധിച്ചില്ലെന്ന് ധോണി കുറ്റപ്പെടുത്തി.
സമ്മര്ദ്ദവും മോശം പാര്ട്ടണര്ഷിപ്പും മത്സരഫലം എതിരാക്കി. മിച്ചല് സാന്റ്നറുടെ നേതൃത്വത്തിലുള്ള സ്പിന്നര്മാരുടെ പ്രകടനം ഇന്ത്യയെ പരീക്ഷിച്ചു. അവര് നല്ല രീതിയില് ബോള് ചെയ്തു. എന്നാല്, അനുകൂലമായുണ്ടായിരുന്ന സാഹചര്യം മുതലെടുക്കാനായില്ല- ധോണി പറഞ്ഞു.
സ്വന്തം മണ്ണില് ഇന്ത്യയുടെ ഏറ്റവും കുറഞ്ഞ ട്വന്റി 20 സ്കോറാണ് നാഗ്പൂരിലേത്. കഴിഞ്ഞവര്ഷം കട്ടക്കില് ദക്ഷിണാഫ്രിക്കക്കെതിരായ മത്സരത്തില് നേടിയ 92 റണ്സായിരുന്നു ഇന്ത്യയുടെ ട്വന്റി 20യിലെ ഏറ്റവും കുറഞ്ഞ സ്കോര്.
അതേസമയം, വിജയത്തിന്റെ ക്രഡിറ്റ് ബൗളര്മാര്ക്ക് നല്കി കിവീസ് നായകന് കെയ്ന് വില്യംസണ്. ഈ ജയത്തോടെ ന്യൂസിലന്ഡിനെതിരെ ജയിക്കാനായിട്ടില്ലെന്ന ഇന്ത്യയുടെ നാണക്കേട് തുടരുന്നു. ഇന്ത്യന് നിരയില് 30 റണ്സെടുത്ത നായകന് ധോണിയും വിരാട് കോഹ്ലി (23) മാത്രമാണ് പിടിച്ചുനിന്നത്. 11 റണ്സ് വഴങ്ങി നാലു വിക്കറ്റെടുത്തു മിച്ചല് സാന്റ്നര് കിവി ബൗളര്മാരില് തിളങ്ങി. ഇഷ് സോധി മൂന്നും, നഥാന് മക്കല്ലം രണ്ടു വിക്കറ്റെടുത്തു. സാന്റ്നറുടേത് ട്വന്റി 20യില് കിവി ബൗളറുടെ മികച്ച പ്രകടനമാണ്.
അതേസമയം എതിരാളികളെ ബഹുമാനിക്കാന് പഠിക്കണമെന്ന് ഇന്ത്യന് ടീമിനോട് മുന് നായകന് സുനില് ഗവാസ്ക്കര്. ട്വന്റി 20 ലോകകപ്പിലെ പ്രഥമ മത്സരത്തില് ന്യൂസിലാന്ഡിനോട് ഇന്ത്യ അടിയറവ് പറഞ്ഞിനു ശേഷമായിരുന്നു ഗവാസ്കറുടെ പ്രതികരണം. പിച്ചിനെ പഴിക്കേണ്ട യാതൊരു കാര്യവുമില്ലെന്നും ബാറ്റ്സ്മാന്മാരുടെ നിരുത്തരവാദപരമായ സമീപനമാണ് ഇന്ത്യന് പരാജയത്തിന് കാരണമെന്നും അമിത ആത്മവിശ്വാസവും തിരിച്ചടിയായെന്നും ഗാവസ്കര് കൂട്ടിച്ചേര്ത്തു.
