കൊല്ലം: സംസ്ഥാനത്തെ മാധ്യമ പ്രവര്ത്തകരുടെ പെന്ഷന് വര്ദ്ധിപ്പിക്കുന്നതില് ഉചിതമായ തീരുമാനം ഉടന് കൈക്കൊള്ളുമെന്ന് മുഖ്യമന്ത്രി വി.ഡി. സതീശന്. പെന്ഷന് കമ്മിറ്റി ഉടന് പുനസംഘടിപ്പിക്കുമെന്നും പെന്ഷന് വര്ദ്ധനയില് കമ്മിറ്റിയുടെ നിര്ദേശവും പരിഗണിക്കുമെന്നും മുഖ്യമന്ത്രി പറഞ്ഞു.
കൊല്ലം കടപ്പാക്കട സ്പോര്ട്സ് ക്ലബ് ഓഡിറ്റോറിയത്തില് സീനിയര് ജേണലിസ്റ്റ്സ് ഫോറം സംസ്ഥാന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. മാധ്യമ പ്രവര്ത്തകര്ക്കായി ചികിത്സാപദ്ധതി ആവിഷ്കരിക്കാനും സര്ക്കാര് നടപടി സ്വീകരിക്കും. ഭാരതത്തില് ആദ്യമായി വയോജനങ്ങള്ക്കായി പ്രത്യേകവകുപ്പ് ആരംഭിച്ച സര്ക്കാര് അവരുടെ സംരക്ഷണത്തിന് ആരോഗ്യപരിരക്ഷ പദ്ധതി നടപ്പാക്കും. മുതിര്ന്ന മാധ്യമ പ്രവര്ത്തകരേയും ഈ പദ്ധതിയില് ഉള്പ്പെടുത്തും.
പഴയകാല മാധ്യമപ്രവര്ത്തകര് ഞങ്ങളെ പോലുള്ള രാഷ്ടീയനേതാക്കള്ക്ക് വിലപ്പെട്ട മാര്ഗനിര്ദേശം നല്കുന്ന വഴികാട്ടികളായിരുന്നു. പക്ഷേ ഇന്നത്തെ മാധ്യമപ്രവര്ത്തനം എങ്ങോട്ടു പോകുന്നു എന്ന് ഗൗരവമായി ചിന്തിക്കേണ്ട കാലമായി. തെറ്റായ വാര്ത്തകള് തിരുത്തുകയും ഖേദപ്രകടനം നടത്തുകയും ചെയ്യുന്ന പതിവ് പണ്ടുണ്ടായിരുന്നു. പക്ഷേ ഇന്ന് തിരുത്തുന്നതിനു പകരം വ്യാജ വാര്ത്ത കൂടുതല് പൊടിപ്പും തൊങ്ങലും വച്ച് വീണ്ടും വരുന്ന അവസ്ഥയാണുള്ളത്. ആകാശത്തു നിന്ന് വാര്ത്ത സൃഷ്ടിക്കുന്ന ഈ പ്രവണതയെപ്പറ്റി മാധ്യമപ്രവര്ത്തകര് ആത്മവിമര്ശനം നടത്തണമെന്നും മുഖ്യമന്ത്രി നിര്ദേശിച്ചു.
സംസ്ഥാന പ്രസിഡന്റ് അലക്സാണ്ടര് സാം അധ്യക്ഷത വഹിച്ചു. മന്ത്രിമാരായ പി.സി. വിഷ്ണുനാഥ്, ബിന്ദു കൃഷ്ണ, മേയര് എ.കെ. ഹഫീസ്, ബി.ബി. ഗോപകുമാര് എംഎല്എ, ജില്ലാ പഞ്ചായത്ത് പ്രസിഡന്റ് ആര്. ലതാദേവി, ആര്.എസ്. ബാബു, ഫോറം ജനറല് സെക്രട്ടറി കെ.പി. വിജയകുമാര്, കെയുഡബ്ല്യുജെ സംസ്ഥാന ജനറല് സെക്രട്ടറി സുരേഷ് എടപ്പാള്, കൊല്ലം പ്രസ് ക്ലബ്ബ് പ്രസിഡന്റ് ഡി. ജയകൃഷ്ണന്, എസ്. സുധീശന് എന്നിവര് പ്രസംഗിച്ചു.
ഇന്ന് രാവിലെ ഒമ്പതിന് പ്രതിനിധി സമ്മേളനം കര്ണാടകത്തിലെ മുതിര്ന്ന മാധ്യമപ്രവര്ത്തകരുടെ സംഘടന പ്രസിഡന്റ് ആര്.പി. സാംബസദാശിവ റെഡ്ഡി ഉദ്ഘാടനം ചെയ്യും. ഉച്ചയ്ക്ക് 12ന് സമാപന സമ്മേളനം പ്രതിപക്ഷ നേതാവ് പിണറായി വിജയന് ഉദ്ഘാടനം ചെയ്യും.
