മൂന്നാര്: പോലീസുകാരന് ആവശ്യപ്പെട്ട ഗ്യാസ് സിലിണ്ടര് നല്കിയില്ല എന്ന പരാതി ഉന്നയിച്ച് ഗ്യാസ് സിലിണ്ടര് കൊണ്ടുപോയ വാഹനം പോലീസുകാരന് കസ്റ്റഡിയിലെടുത്തത് പ്രശ്നങ്ങള്ക്കിടയാക്കി.
ഇന്നലെ രാവിലെ ഗ്യാസ് സിലിണ്ടര് ആവശ്യപ്പെട്ട് ജീവി ഗ്യാസ് ഏജന്സിയെ മൂന്നാര് സ്റ്റേഷനിലെ പോലീസുകാരന് സമീപിക്കുകയായിരുന്നു. ഗ്യാസ് സിലിണ്ടര് സ്റ്റോക്ക് എത്തിയിട്ടില്ലെന്നും നേരത്തേ ബുക്ക് ചെയ്തിട്ടുള്ളവര്ക്കു നല്കാനുളളതു മാത്രമേ ഉള്ളതെന്നും നാളെ വന്നാല് നല്കാമെന്നും പറഞ്ഞതുമാണ് ഏമാനെ ചൊടിപ്പിച്ചത്. അരിശം മൂത്ത ഏമാന് ഗ്യാസ് ഏജന്സിയുടെ വാഹനം കസ്റ്റഡിയിലെടുത്ത് പോലീസ് സ്റ്റേഷനിലെത്തിക്കുകയും ചെയ്തു. ആനച്ചാലിലെ ഗോഡൗണില് നിന്നും ഗ്യാസ് സിലിണ്ടറുകള് വിതരണത്തിനായി കൊണ്ടുവരുന്നതിനിടയില് പോലീസ് കെഎസ്ആര്ടിസി ഡിപ്പോയ്ക്ക് സമീപത്തു വച്ച് രേഖകള് കൃത്യമല്ലെന്ന് ചൂണ്ടിക്കാട്ടിയാണ് വാഹനം കസ്റ്റഡിയിലെടുത്തത്. എന്നാല് വാഹനത്തിന്റെ രേഖകളെല്ലാം കൃത്യമാണെന്നും മനപൂര്വ്വം പോലീസ് വാഹനം കസ്റ്റഡിയിലെടുക്കകയാണെന്നുമാണ് ഗ്യാസ് ഏജന്സിയുമായി ബന്ധപ്പെട്ടവര് പറഞ്ഞത്. വിവരം കേട്ടറിഞ്ഞെത്തിയ രാഷ്ട്രീയക്കാരും നാട്ടുകാരും സ്റ്റേഷനിലെത്തിയതോടെ സംഭവം വിവാദമാകുകയും ചെയ്തു. സംഭവം വിവാദമായതോടെ വൈകുന്നേരത്തിനുള്ളില് ബന്ധപ്പെട്ട രേഖകള് നല്കാമെന്ന ഉറപ്പിന്മേല് അര മണിക്കൂറിനു ശേഷം വാഹനം വിട്ടയക്കുകയായിരുന്നു.
