ച്ചു
കണ്ണൂര്: കറുവാപ്പട്ടക്ക് പകരം ഇന്ത്യയില് വിറ്റഴിക്കപ്പെടുന്ന കാസിയ എന്ന മാരകവിഷമടങ്ങിയ ഉത്പന്നത്തിനെതിരെ കണ്ണൂര് പയ്യാമ്പലം സ്വദേശിയും കറുവാപ്പട്ടകര്ഷകനുമായ ലിയാനാര്ഡോ ജോണിന്റെ ഒറ്റയാള്പോരാട്ടം വിജയത്തിലേക്കടുക്കുന്നു. കറുവാപ്പട്ടക്ക് പകരം മാരകവിഷമടങ്ങിയ കാസിയ ഇന്ത്യയില് ഇറക്കുമതി ചെയ്യുന്നത് ഇതുവരെ നിരോധിക്കാത്തതുമായി ബന്ധപ്പെട്ട വിഷയത്തില് വിജിലന്സ് കമ്മീഷന് അന്വേഷണം ആരംഭിച്ചതായി ലിയാനാര്ഡോ പത്രസമ്മേളനത്തില് പറഞ്ഞു. ഇതേത്തുടര്ന്ന് ഫുഡ് സേഫ്റ്റി ആന്റ് സ്റ്റാന്റേര്ഡ് അതോറിറ്റി ഓഫ് ഇന്ത്യയുടെ ന്യൂഡല്ഹിയിലെ ഹെഡ്ക്വാര്ട്ടേഴ്സില് വെച്ച് കാസിയ വിഷയവുമായി ബന്ധപ്പെട്ട് ശാസ്ത്രവിദഗ്ധരുടെ ഒരു മീറ്റിങ്ങ് ഇന്ന് ചേരാന് തീരുമാനിച്ചിരിക്കുകയാണ്. എന്നാല് ഈ മീറ്റിങ്ങില് താനുള്പ്പെടെ പങ്കെടുക്കേണ്ടതാണെങ്കിലും മീറ്റിങ്ങില് എന്താണ് ചര്ച്ച ചെയ്യുന്നതെന്നും മറ്റും രഹസ്യമായിരിക്കുവാന് ബോധപൂര്വ്വം തന്നെ ഒഴിവാക്കുന്നതിന്റെ ഭാഗമായി 23ന് കാലത്ത് 11 മണിയോടെയാണ് മീറ്റിങ്ങിനെക്കുറിച്ചുള്ള വിവരം അറിയിച്ചുകൊണ്ടുള്ള കത്ത് തനിക്ക് ലഭിക്കുന്നതെന്ന് ലിയോനാര്ഡ് കണ്ണൂരില് പത്രസമ്മേളനത്തില് പറഞ്ഞു. കാസിയ ഇറക്കുമതി ചെയ്യുന്നത് തടയാതിരിക്കാനുള്ള എല്ലാ ശ്രമവും ഉന്നതങ്ങളില് ശക്തമായി നടന്നുകൊണ്ടിരിക്കുന്നുണ്ടെങ്കിലും വിജിലന്സ് കമ്മീഷന്റെ ഏറ്റവും ഒടുവിലത്തെ നടപടി ഏറെ പ്രതീക്ഷാവഹമാണ്. കാസിയയുടെ ഇറക്കുമതി തടയുന്നതോടെ രാജ്യത്ത് വര്ദ്ധിച്ച് കൊണ്ടിരിക്കുന്ന കാന്സര് തുടങ്ങിയ മാരകരോഗങ്ങള് പിടിപെടുന്നവരുടെ എണ്ണം 30 ശതമാനമെങ്കിലും കുറയുമെന്ന കാര്യം തീര്ച്ചയാണെന്നും ലിയോനാര്ഡ് പറഞ്ഞു.
