സ്വന്തം ലേഖകന്
ഇടുക്കി: കുരുന്നുകളെ താലോലിക്കുന്ന അമ്മക്കൈകള് നൊന്ത് പ്രസവിച്ച കുരുന്നുകള്ക്ക് നേരെ കൊലവിളി നടത്തുന്ന ഞെട്ടിപ്പിക്കുന്ന സ്ഥിതി വിശേഷമാണ് ഒരാഴ്ചയ്ക്കിടെ ഇടുക്കി ജില്ലയില് അരങ്ങേറിയത്. മൂന്ന് കുരുന്നുകളെയാണ് പെറ്റമ്മമാര് കൊലപ്പെടുത്തിയത്.കഴിഞ്ഞ 17ന് കുടയത്തൂരിന് സമീപം പാത്തിക്കപ്പാറയില് വിന്സെന്റിന്റെ മകന് ആഷിനെയാണ് അമ്മ ജയ്സമ്മ ശ്വാസം മുട്ടിച്ച് കൊലപ്പെടുത്തിയത്. കുഞ്ഞിനെ കൊന്നതിന് ശേഷം ഇവരും ആത്മഹത്യയ്ക്ക് ശ്രമിച്ചു. അയല്വാസിയായ അന്നമ്മ (92) എന്ന വൃദ്ധയ്ക്ക് തലയ്ക്ക് അടിയേറ്റിരുന്നു. ഇത് സംബന്ധിച്ചുള്ള അന്വേഷണത്തിനിടെ ജയ്സമ്മയെ പോലീസ് ചോദ്യം ചെയ്തിരുന്നു. ഇതില് മനം നൊന്താണ് കുഞ്ഞിനെ കൊന്ന് ജയ്സമ്മ ജീവനൊടുക്കാന് ശ്രമിച്ചത്. ഈ സംഭവത്തിന്റെ കനലണയും മുന്പാണ് വണ്ടന്മേട് നെറ്റിത്തൊഴു കുറ്റിപ്പുറത്ത് രണ്ട് വയസുകാരിയെ തീകൊളുത്തി കൊന്നതിന് ശേഷം അമ്മ ജിന്സിയും തീകൊളുത്തി ജീവനൊടുക്കിയത്.കുടുംബപരമായി ചില പ്രശ്നങ്ങളാണ് ഈ മരണങ്ങള്ക്ക് കാരണമായത്.ഇന്നലെ തോപ്രാംകുടിയില് പിഞ്ചു കുഞ്ഞിനേയും മാതാവിനേയും കുളത്തില് മരിച്ച നിലയില് കണ്ടെത്തിയിരുന്നു. ഇന്നലെ രാവിലെയാണ് തോപ്രാംകുടി കാരിക്കവല പേട്ടുപാറ പരേതനായ അനീഷിന്റെ ഭാര്യ സനീഷ (27) ഇവരുടെ രണ്ട് വയസ്സുള്ള കിച്ചുവെന്ന് വിളിക്കുന്ന ദേവദത്ത് എന്നിവരെ വീടിനു സമീപമുള്ള കുളത്തില് മരിച്ച നിലയില് കണ്ടെത്തിയത്. പുലര്ച്ചെ ഇവരെ വീട്ടില് കാണാതായപ്പോള് അന്വേഷിച്ചിറങ്ങിയവരാണ് അമ്മയുടേയും മകന്റെയും മൃതദേഹം കണ്ടത്. സനീഷയുടെ ഭര്ത്താവ് അനീഷ് 40 ദിവസം മുമ്പ് കോതമംഗലത്തുണ്ടായ ബൈക്കപകടത്തില് മരിച്ചിരുന്നു. ഈ സംഭവത്തിനു ശേഷം സനീഷ മാനസ്സിക പിരിമുറുക്കത്തിലായിരുന്നു. കുടുംബ പ്രശ്നങ്ങളും മാനസിക സമ്മര്ദ്ദങ്ങളുമാണ് കുരുന്നുകളെ കൊന്ന് ജീവനൊടുക്കാന് പെറ്റമ്മമാരെ പ്രേരിപ്പിക്കുന്ന ഘടകം.
