ഇരിട്ടി: പാരമ്പര്യരീതിയില്‍ നിന്നും മാറി ആധുനിക സമ്പ്രദായങ്ങള്‍ ഉപയോഗിച്ച് കശുവണ്ടി കൃഷി എങ്ങിനെ വ്യാപകമാക്കാം എന്നതിനെക്കുറിച്ച് അറിവ് നല്‍കുന്നതിനും പഠനം നടത്തുന്നതിനുമായി കേരളാ കശുവണ്ടി വികസന ഏജന്‍സിയുടെ നിര്‍ദ്ദേശപ്രകാരം സിംഗപ്പൂര്‍ ആസ്ഥാനമായി പ്രവര്‍ത്തിക്കുന്ന കമ്പനി എക്‌സിക്യുട്ടീവ് ഇരിട്ടിയില്‍ എത്തി. സിംഗപ്പൂര്‍ എമിറേറ്റ് കമ്പനി ചീഫ് എക്‌സിക്യുട്ടീവ് ജേക്കബ് റോബിന്‍സ് ആണ് ഇരിട്ടിയില്‍ ഈ മേഘലയിലെ കര്‍ഷകരുമായി ചര്‍ച്ച നടത്തിയത്. കാഷ്യൂ സെല്‍ സംസ്ഥാന കണ്‍വീനര്‍ ജോസ് പൂമലയുടെ നേതൃത്വത്തില്‍ നടന്ന ചര്‍ച്ചയില്‍ കശുവണ്ടി കര്‍ഷകരായ ജോസ് മണികൊമ്പേല്‍, ബെന്നിച്ചന്‍ മടത്തിനകം, സോജന്‍ ചാലില്‍, ബിബിന്‍ ജോസഫ്, ആന്റണി പുതിയട്ടയില്‍, മാത്യു പുളിക്കാട്ട്, വടക്കേല്‍ മത്തച്ചന്‍ എന്നിവര്‍ പങ്കെടുത്തു.
ജൈവ വളങ്ങളും ജൈവ കീടനാശിനികളും ഉപയോഗിച്ച് വിവിധ രാഷ്‌ട്രങ്ങളില്‍ ആധുനിക രീതിയില്‍ നടത്തുന്ന കശുവണ്ടി കൃഷിയെക്കുറിച്ച് ജേക്കബ് റോബിന്‍സ് കര്‍ഷകര്‍ക്ക് വിവരിച്ചു കൊടുത്ത്. പാരമ്പര്യരീതിയില്‍ ഈ മേഖലകളില്‍ നടത്തുന്ന കൃഷി രീതികളെക്കുറിച്ച് ചോദിച്ചറിയുകയും ഇന്നത്തെ രീതിയില്‍ നിന്നും വിഭിന്നമായി കൃഷി ചെയ്താല്‍ മൂന്നോ നാലോ ഇരട്ടി വിളവുണ്ടാക്കാന്‍ സാധിക്കുമെന്നും അദ്ദേഹം പറഞ്ഞു. മേഘലയിലെ കൃഷിയിടങ്ങള്‍ സന്ദര്‍ശിച്ച ശേഷം കര്‍ണ്ണാടകത്തിലെ പുത്തൂരും റോബിന്‍സ് സന്ദര്‍ശിക്കും. കേരളത്തില്‍ കണ്ണൂര്‍ ജില്ലയും കര്‍ണ്ണാടകത്തില്‍ പുത്തൂരുമാണ് പഠനം നടത്തുന്നതിനായി കേരളാ കശുവണ്ടി വികസന ഏജന്‍സി നിര്‍ദ്ദേശിച്ചിരിക്കുന്നത്.
