കുമരകം: കുമരകം പോലീസ് സ്റ്റേഷനു നേരേ ആക്രമണമുണ്ടായ പശ്ചാത്തലത്തില്‍ നിരീക്ഷണ ക്യാമറ സ്ഥാപിക്കണമെന്ന ആവശ്യം ശക്തം. സാമൂഹ്യ വിരുദ്ധരുടെ ആക്രമണം പോലീസ് സ്റ്റേഷനുനേരെ നടക്കുന്നതില്‍ ജനങ്ങള്‍ ആശങ്കാകുലരാണ്. കഴിഞ്ഞ ദിവസം രാത്രി 12ന് ശേഷമാണ് സംഭവം.
പോലീസ് സ്റ്റേഷനോടു ചേര്‍ന്നുള്ള ടൂറിസ്റ്റു പോലീസിനായി പണി കഴിപ്പിച്ചിരിക്കുന്ന കെട്ടിടത്തിന്റെ ജനല്‍ ചില്ലുകളാണ് അക്രമികള്‍ എറിഞ്ഞു തകര്‍ത്തത്. പോലീസ് സ്റ്റേഷന് മുന്‍വശത്തുള്ള ദന്ത ക്ലിനിക്കിന്റെ ഡിഷ് ആന്റിന തകര്‍ക്കുകയും റിസോര്‍ട്ട് ജീവനക്കാര്‍ വാടകക്കു താമസിക്കുന്നിടത്തെത്തി അവരെ ഭീഷണിപ്പെടുത്തുകയും ചെയ്തു പ്രതികളെക്കുറിച്ച് വ്യക്തമായ സൂചന ലഭിച്ചതായും പ്രതികള്‍ ഉടനെ പിടിയിലാകുമെന്നും പോലീസ് പറഞ്ഞു.
പ്രമുഖ ഇടതുപക്ഷ പ്രസ്ഥാനത്തിന്റെ നേതൃത്വത്തിലും കുമരകം പോലീസ് സ്റ്റേഷനു നേരേ അക്രമം നടന്നിട്ടുണ്ട്. ഇന്നലെ നടന്ന അക്രമത്തില്‍ സ്റ്റേഷനില്‍ ഉറങ്ങിക്കിടന്ന പോലീസ് ഡ്രൈവര്‍ ബിജുമോന്റെ ദേഹത്ത് ചില്ലുകളും കല്ലും പതിച്ചെങ്കിലും പരിക്കില്ല.
കോട്ടയം സിഐ ഗിരീഷ് പി. സാരഥിയുടെയും കുമരകം എസ്‌ഐ വി.വി. നടേശന്റെയും നേതൃത്വത്തിലാണ് അന്വേഷണം. പ്രതികളെക്കുറിച്ച് സൂചന ലഭിച്ചതായി പോലീസ് അറിയിച്ചു.
