പത്തനംതിട്ട: ആറന്മുള ക്ഷേത്രത്തിലെ ആചാര അനുഷ്ഠാനങ്ങളുമായി അഭേദ്യ ബന്ധമുള്ള തിരുവോണത്തോണി ദേവസ്വം ബോര്‍ഡിന്റെ അനാസ്ഥയെ തുടര്‍ന്ന് മുങ്ങി. തോണിപ്പലക ഇളകിയിട്ടുണ്ട്. മധ്യഭാഗത്തെ മണ്ഡപത്തിനും കേടുണ്ട്. മണ്ഡപത്തിന്റെ മകുടം ഇളകിപ്പോയി. ഇത് കണ്ടെത്താനായിട്ടില്ല. ഭക്തജന വികാരം എതിരാകുമെന്നതിനാല്‍ ദേവസ്വം അധികൃതര്‍ ഇടപെട്ട് തോണി നിവര്‍ത്തി ഇപ്പോള്‍ ക്ഷേത്രക്കടവില്‍ കെട്ടിയിട്ടിട്ടുണ്ട്.
പ്രളയജലം പടിഞ്ഞാറെ നടയിലുള്ള തോണിപ്പുരയില്‍ കയറിയപ്പോഴാണ് തിരുവോണത്തോണി ഇറക്കി ക്ഷേത്രക്കടവില്‍ കെട്ടിയിട്ടത്. ജലനിരപ്പ് താഴ്ന്നു വള്ളസദ്യ പുനരാരംഭിച്ചപ്പോള്‍ ക്ഷേത്രക്കടവില്‍ അടുപ്പിക്കുന്ന പള്ളിയോടങ്ങളില്‍ നിന്ന് ചില തുഴച്ചില്‍കാര്‍ തോണിയിലൂടെ കയറിയിറങ്ങിയിരുന്നു. ഇതാണ് തോണി മറിയാന്‍ കാരണമെന്ന് ദേവസ്വം അധികൃതര്‍ പറയുമ്പോള്‍ തോണിയുടെ അറ്റകുറ്റപ്പണി നടത്തുന്നതില്‍ ദേവസ്വം അധികൃതര്‍ കാട്ടിയ അലംഭാവമാണ് അപകടത്തിനിടയാക്കിയതെന്ന് ഭക്തരും ചൂണ്ടിക്കാട്ടുന്നു.
പള്ളിയോടത്തേക്കാള്‍ ഉടമയും തടിക്കോളുമുള്ള തോണിയില്‍ എത്ര പേര്‍ കയറിയാലും മറിയാന്‍ സാധ്യത തീരെയില്ല. വള്ളസദ്യക്കായി പള്ളിയോടങ്ങള്‍ ക്ഷേത്രക്കടവില്‍ അടുക്കുമെന്ന് അറിഞ്ഞിട്ടും സുരക്ഷിതസ്ഥാനത്തേക്ക് തോണി മാറ്റാതിരുന്നതും ബോര്‍ഡിന്റെ വീഴ്ചയാണെന്നും തോണിയിലെ ദ്വാരത്തിലൂടെ വെള്ളം ഇരച്ചുകയറിയതാണ് മുങ്ങാന്‍ കാരണമെന്നും നാട്ടുകാര്‍ പറയുന്നു. തോണി സംരക്ഷിക്കാന്‍ ദേവസ്വം ബോര്‍ഡ് ഒരു നടപടിയും എടുത്തിട്ടില്ലെന്നും ആക്ഷേപമുണ്ട്. തോണിയുടെ ആണിത്തറയ്‌ക്കും ഇളക്കം സംഭവിച്ചിട്ടുണ്ട്. കേടുപാട് ബോധ്യമായതോടെ മുഖ്യശില്‍പി ചങ്ങങ്കരി വേണു ആചാരി എത്തി തോണി പരിശോധിച്ചു. ഇന്ന് കരക്കുകയറ്റി അറ്റകുറ്റപ്പണി നടത്താനാണ് നീക്കം.
