കോട്ടയം: തപസ്യ കലാസാഹിത്യവേദി നാല്പ്പതാം വാര്ഷികത്തിന് മുന്നോടിയായി സംസ്ഥാന അദ്ധ്യക്ഷന് എസ്.രമേശന് നായരുടെ നേതൃത്വത്തില് ഗോകര്ണ്ണം മുതല് കന്യാകുമാരി വരെ നടത്തുന്ന രണ്ടാമത്തെ സാംസ്കാരിക തീര്ത്ഥയാത്രയ്ക്ക് 14,15 തീയതികളില് ജില്ലയിലെ വിവിധ കേന്ദ്രങ്ങളില് സമുചിതമായി സ്വീകരണം നല്കും.
14ന് ജില്ലയില് പ്രവേശിക്കുന്ന യാത്രയ്ക്ക് രാവിലെ 9.30ന് പൂഞ്ഞാര് പനച്ചിപ്പാറയില് സ്വീകരണം നല്കും. 9ന് നൂറിലധികം ഇരുചക്രവാഹനങ്ങളുടെ അകമ്പടിയോടെ ഈരാറ്റുപേട്ടയില്നിന്നും സ്വീകരിച്ച് പനച്ചികപ്പാറയിലെത്തും. 10.30ന് പാലാ ളാലം പാലം ജംഗ്ഷനിലും 11.30ന് കിടങ്ങൂര് ക്ഷേത്രമൈതാനത്തും 12.30ന് ഏറ്റുമാനൂര് ക്ഷേത്രസംരക്ഷണ സമിതി ഹാളിലും സ്വീകരണം നല്കും. ഉച്ചയ്ക്ക് 2ന് വേദഗിരി പഞ്ചപാണ്ഡവര് ശിലകള് സ്ഥിതി ചെയ്യുന്ന വ്യാസപീഠത്തിലെ സന്ദര്ശനത്തിന് ശേഷം കുടമാളൂര് അമ്പാടിക്കവലയിലെ സ്വീകരണം 2.45ന് നടക്കും.
3.30ന് സൂര്യകാലടിമന സന്ദര്ശനത്തിന് ശേഷം ശിവഗിരി തീര്ത്ഥാടനത്തിന് തുടക്കം കുറിച്ച നാഗമ്പടം മഹാദേവക്ഷേത്രസന്ദര്ശനം 4.15നാണ്. നാഗമ്പടം ക്ഷേത്രത്തില് നിന്നും അനേകം വാഹനങ്ങളുടെ അകമ്പടിയോടെ യാത്രയെ തിരുനക്കരയിലേക്ക് ആനയിക്കും. വൈകുന്നേരം 5ന് പഴയ പോലീസ് സ്റ്റേഷന് മൈതാനത്ത് നടക്കുന്ന സമാപനസമ്മേളനം എം.ജി.യൂണിവേഴ്സിറ്റി വിവേകാനന്ദ ചെയര് ചെയര്മാന് പ്രൊഫ. ഒ.എം.മാത്യു ഉദ്ഘാടനം ചെയ്യും. സ്വാഗതസംഘം അദ്ധ്യക്ഷന് ഡോ. പി.വി.വിശ്വനാഥന് നമ്പൂതിരി അദ്ധ്യക്ഷത വഹിക്കും. ബാലഗോകുലം സംസ്ഥാന സമിതിയംഗവും പ്രവാസി മേഖലാ സംയോജകനുമായ എന്. ഹരീന്ദ്രന് മാസ്റ്റര് മുഖ്യപ്രഭാഷണവും നടത്തും. ഡോ. എം.ബി.അനില്കുമാര് തിരുവനന്തപുരം, തപസ്യ സംസ്ഥാന സെക്രട്ടറി ഡോ. ആര്.അശ്വതി എന്നിവര് പ്രസംഗിക്കും. കവി.എസ്.രമേശന് നായര് മറുപടി പ്രസംഗം നടത്തും. കോട്ടയത്തെ വിവിധ സാംസ്കാരിക സംഘടനകള് യാത്രാനായകന്മാരെ ആദരിക്കും. ജില്ലാ അദ്ധ്യക്ഷന് കവനമന്ദിരം പങ്കജാക്ഷന് സ്വാഗതവും സെക്രട്ടറി പി.ജി.ഗോപാലകൃഷ്ണന് നന്ദിയും പറയും.
15ന് രാവിലെ 8.30ന് കൊട്ടാരത്തില് ശങ്കുണ്ണിയുടെ ഭവനവും കെ.എസ്.എസ് സ്കൂള് ഓഫ് ആര്ട്ട്സും സന്ദര്ശിച്ചതിന് ശേഷം ദക്ഷിണമൂകാംബിക ക്ഷേത്രത്തിലെ സ്വീകരണത്തിന് ശേഷം10ന് ചങ്ങനാശേരി മുനിസിപ്പല് ജംഗ്ഷനില് സ്വീകരണം നല്കും.
മന്നം സമാധിയിലും ലക്ഷ്മിപുരം കൊട്ടാരത്തിലും യാത്രാസംഘം സന്ദര്ശനം നടത്തുന്നതോടെ ജില്ലയിലെ പര്യടനം പൂര്ത്തിയാക്കി പത്തനംതിട്ട ജില്ലയിലേക്ക് യാത്രതിരിക്കും.
