വാഷിംഗ്ടണ്: മുസ്ലീം ജനതയെ അമേരിക്ക ഒരിക്കലും അടിച്ചമര്ത്തുന്നില്ലെന്ന് യുഎസ് പ്രസിഡന്റ് ബറാക് ഒബാമ. എല്ലാ മതവിശ്വാസങ്ങളെയും നമ്മള് സംരക്ഷിക്കുന്നുണ്ടെന്ന് അമേരിക്കക്കാര് കാണിച്ചുകൊടുക്കണം. മുസ്ലീം വിരുദ്ധതയും മുസ്ലീങ്ങള്ക്കെതിരായ മുന്വിധിയും വിവേചനവും അമേരിക്കന് സംസ്കാരത്തെ മുറിവേല്പ്പിയ്ക്കുന്നെന്നും അദ്ദേഹം പറഞ്ഞു.
ഭീകരവാദത്തിനെതിരെ പോരാടാനുള്ള ഏറ്റവും മികച്ച മാര്ഗമാണിതെന്നും ഒബാമ പറഞ്ഞു. മേരിലാന്ഡിലെ ബാള്ട്ടിമോറിലുള്ള മുസ്ലീം ജനവിഭാഗങ്ങളെ അഭിസംബോധന ചെയ്തു സംസാരിക്കുകയായിരുന്നു ഒബാമ.
ഒരു മതവിശ്വാസത്തിന്റെ നേരെയുള്ള ആക്രമണം എല്ലാ മതവിശ്വാസങ്ങള്ക്കുമെതിരായ ആക്രമണമാണെന്ന് ഒബാമ പറഞ്ഞു. മുസ്ലീങ്ങളെ അധിക്ഷേപിച്ച് വംശീയ, വര്ഗീയ പരാമര്ശങ്ങള് നടത്തിയ പ്രസിഡന്റ് സ്ഥാനത്തേയ്ക്കുള്ള മത്സരാര്ത്ഥികളില് ഒരാളായ ഡൊണാള്ഡ് ട്രമ്പ് അടക്കമുള്ള റിപ്പബ്ലിക്കന് നേതാക്കളെ ഒബാമ രൂക്ഷമായി വിമര്ശിച്ചു.
കഴിഞ്ഞ വര്ഷം ബാള്ട്ടിമോറിലെ പള്ളിയ്ക്ക് നേരെ രണ്ട് തവണ ഭീഷണികള് വന്നിരുന്നതായി ഒബാമ ചൂണ്ടിക്കാട്ടി. ഏതെങ്കിലുമൊരു മതവിഭാഗത്തെ ആക്രമിയ്ക്കാന് ലക്ഷ്യം വയ്ക്കുമ്പോള് നമ്മളെല്ലാവരും അതിനെതിരെ പ്രതികരിയ്ക്കണമെന്നും ഒബാമ പറഞ്ഞു. മുന് പ്രസിഡന്റ് തോമസ് ജഫേഴ്സന് മതങ്ങളുടെ അവകാശങ്ങളെപ്പറ്റി പറയുമ്പോള് ഇസ്ലാം മതത്തെ പറ്റി പ്രത്യേകം പരാമര്ശിച്ചിരുന്നതായി ഒബാമ ചൂണ്ടിക്കാട്ടി. ജഫേഴ്സണ് രഹസ്യമായി മുസ്ലീമാണെന്ന് പലരും പറഞ്ഞിരുന്നു.
