കോട്ടയം: കേരളത്തിന്റെ സമരനായകനെ വരവേല്‍ക്കാന്‍ അമിത്്ഷാ ഇന്ന് കോട്ടയത്തെത്തും. ബിജെപി സംസ്ഥാന പ്രസിഡന്റ് കുമ്മനം രാജശേഖരന്‍ നയിക്കുന്ന വിമോചനയാത്രയ്‌ക്ക് ജില്ലാ കമ്മിറ്റി നല്‍കുന്ന സ്വീകരണ സമ്മേളനം ഉദ്ഘാടനം ചെയ്യുന്നതിനാണ് ദേശീയ അദ്ധ്യക്ഷന്‍ അമിത്ഷാ കോട്ടയത്തെത്തുന്നത്. വിമോചനയാത്രയേയും അമിത്ഷായേയും വരവേല്‍ക്കാന്‍ കോട്ടയം അക്ഷരാര്‍ത്ഥത്തില്‍ ഒരുങ്ങിക്കഴിഞ്ഞു. നഗരം പൂര്‍ണ്ണമായി ഹരിത കുങ്കുമശോഭയിലാണ്.
അമ്പതിനായിരത്തോളം പ്രവര്‍ത്തകര്‍ക്ക് സമ്മേളനത്തില്‍ പങ്കെടുക്കുവാനുള്ള ക്രമീകരണങ്ങളാണ് ഒരുക്കിയിരിക്കുന്നതെന്ന് ബിജെപി ജില്ലാ പ്രസിഡന്റ് എന്‍.ഹരി അറിയിച്ചു. ചുരുങ്ങിയ ദിവസങ്ങള്‍ക്കുള്ളില്‍ ചിട്ടയായ പ്രവര്‍ത്തനങ്ങളിലൂടെ ജില്ല മുഴുവന്‍ ശക്തമായ പ്രചരണമാണ് അമിത്ഷായുടെ വരവേല്‍പ്പിന് ഒരുക്കിയിരിക്കുന്നത്.
പഞ്ചായത്ത് കമ്മിറ്റി പ്രസിഡന്റുമാരാണ് വിമോചനയാത്രയെ പണക്കിഴി നല്‍കി സ്വീകരിക്കുന്നത്. നെഹ്‌റു സ്റ്റേഡിയത്തില്‍ 2.30ന് സമ്മേളനം ആരംഭിക്കും. ഉച്ചയ്‌ക്ക് രണ്ട് മണി മുതല്‍ക്കേ പ്രവര്‍ത്തകര്‍ സ്റ്റേഡിയത്തില്‍ എത്തിച്ചേരും. വൈകിട്ട് നാലുമണിക്കാണ് അമിത്ഷാ വേദിയിലെത്തുന്നത്. ബിജെപി ജില്ലാ പ്രസിഡന്റ് എന്‍.ഹരി അദ്ധ്യക്ഷത വഹിക്കും. ജില്ലാ ജനറല്‍ സെക്രട്ടറി കെ.പി.സുരേഷ് സ്വാഗതം ആശംസിക്കും. ബിജെപി ദേശീയ സംസ്ഥാന നേതാക്കളായ പി.കെ.കൃഷ്ണദാസ്, വി.മുരളീധരന്‍, എം.ടി.രമേശ്, കെ.സുരേന്ദ്രന്‍, സി.കെ.പത്മനാഭന്‍, പി.എം.വേലായുധന്‍, ശോഭാ സുരേന്ദ്രന്‍ എന്നിവര്‍ പങ്കെടുക്കും.
സ്റ്റേഡിയത്തില്‍ എത്തുന്ന മുഴുവന്‍ പ്രവര്‍ത്തകര്‍ക്കും കുടിവെള്ളമെത്തിക്കുന്നതിന് ഇരുപത്തഞ്ച് കേന്ദ്രങ്ങളാണ് സേവാഭാരതിയുടെ നേതൃത്വത്തില്‍ ഒരുക്കിയിരിക്കുന്നത്. കൂടാതെ ആംബുലന്‍സ് സംവിധാനങ്ങളും മെഡിക്കല്‍ വിഭാഗവും സ്റ്റേഡിയത്തില്‍ സേവാഭാരതി സജ്ജമാക്കിയിട്ടുണ്ട്. സിആര്‍പിഎഫിന്റെയും കേരള പോലീസിന്റെയും നിരീക്ഷണത്തിലാണ് നെഹ്‌റു സ്‌റ്റേഡിയത്തിലെ സമ്മേളനവേദി. കൂടാതെ അഞ്ഞൂറോളം വാളണ്ടിയര്‍മാരെയും ബിജെപി അണിനിരത്തും.
സമ്മേളനത്തിനെത്തുന്നവര്‍ വാഹനങ്ങള്‍ നിര്‍ദ്ദേശിച്ച സ്ഥലങ്ങളില്‍ പാര്‍ക്ക് ചെയ്യണം. പാലാ, ഏറ്റുമാനൂര്‍, വൈക്കം, കടുത്തുരുത്തി ഭാഗങ്ങളില്‍നിന്നെത്തുന്ന വലിയവാഹനങ്ങള്‍ കോട്ടയം റയില്‍വേ സ്‌റ്റേഷന് പുറകിലുള്ള ഗുഡ്‌ഷെഡ് റോഡിന്റെ വശത്തും തെറിയ വാഹനങ്ങള്‍ പോലീസ് ഗ്രൗണ്ടിന് സമീപം റോഡ് സൈഡിലും ആണ് പാര്‍ക്ക് ചെയ്യേണ്ടത്. ചങ്ങനാശേരി, പുതുപ്പള്ളി, കോട്ടയം, പൂഞ്ഞാര്‍, കാഞ്ഞിരപ്പള്ളി തുടങ്ങിയ നിയോജകമണ്ഡലങ്ങളില്‍നിന്നെത്തുന്ന വലിയവാഹനങ്ങള്‍ കോടിമത നാലുവരിപാത റോഡിന്റെ വശങ്ങളിലും ചെറിയ വാഹനങ്ങള്‍ കോടിമത മാര്‍ക്കറ്റ് റോഡ്ഭാഗത്തുമാണ് പാര്‍ക്ക് ചെയ്യേണ്ടത്. സമ്മേളനത്തില്‍ പങ്കെടുക്കാന്‍ വരുന്നവര്‍ വാഹനങ്ങള്‍ നെഹ്‌റു സ്റ്റേഡിയത്തിന് സമീപം പ്രവര്‍ത്തകരെ ഇറക്കിയതിന് ശേഷം നിശ്ചയിക്കപ്പെട്ട സ്ഥലങ്ങളില്‍ പാര്‍ക്ക് ചെയ്യേണ്ടതാണെന്ന് ജില്ലാ ജനറല്‍ സെക്രട്ടറി കെ.പി.സുരേഷ് അറിയിച്ചു.
