കോട്ടയം: റബ്ബര് വിലയിടിവിനെതിരെ എല്ഡിഎഫ് ഇന്ന് നടത്തുന്ന ജില്ലാ ഹര്ത്താല് ജനങ്ങളെ കബളിപ്പിക്കാനാണെന്ന് കര്ഷകമോര്ച്ച സംസ്ഥാന പ്രസിഡന്റ് പി.ആര്.മുരളീധരന് ആരോപിച്ചു. റബ്ബര് വിലയിടിവ് തടയാന് വാജ്പേയിയുടെ നേതൃത്വത്തിലുള്ള മുന് എന്ഡിഎ സര്ക്കാര് എടുത്ത എല്ലാ നടപടികളും വന്കിട റബര് വ്യവസായ ലോബിക്കുവേണ്ടി അട്ടിമറിച്ചത് ഒന്നാം യുപിഎ ഗവണ്മെന്റാണ്. ഇടത് മുന്നണി ഈ നടപടികളെ എതിര്ത്തില്ലെന്ന് മാത്രമല്ല പിന്തുണയ്ക്കുകയും ചെയ്തിരുന്നു. ഇപ്പോള് റബ്ബര്മേഖലയെ സഹായിക്കാന് പ്രധാനമന്ത്രി നരേന്ദ്രമോദി തൃശ്ശൂരില് പ്രഖ്യാപിച്ച പദ്ധതികള് കേന്ദ്രസര്ക്കാര് നടപ്പിലാക്കിത്തുടങ്ങിയിരിക്കുന്നു. റബ്ബര് ഇറക്കുമതിച്ചുങ്കം 25ശതമാനം ആക്കി ഉയര്ത്തിയ കേന്ദ്രസര്ക്കാര് തുറമുഖനിയന്ത്രണവും ഏര്പ്പെടുത്തി. കൂടാതെ സ്വാഭാവിക റബ്ബറിന്റെ ഇറക്കുമതിക്ക് താല്ക്കാലിക നിരോധനവും ഏര്പ്പെടുത്തിയ ശേഷം ഹര്ത്താല് നടത്തുന്നത് ജനങ്ങളെ കബളിപ്പിക്കാനാണ്. റബ്ബര് കര്ഷകരുടെ പേരില് മുതലക്കണ്ണീരൊഴുക്കുന്ന ഇടതുമുന്നണി തങ്ങളുടെ ഭരണകാലത്ത് റബ്ബര് കര്ഷകര്ക്ക് എന്ത് സഹായമാണ് ചെയ്തതെന്ന് വ്യക്തമാക്കണമെന്ന് പി.ആര്.മുരളീധരന് ആവശ്യപ്പെട്ടു.
ചങ്ങനാശേരി: ഇടതുമുന്നണി ആഹ്വാനം ചെയ്തിട്ടുള്ള കോട്ടയം ജില്ലയിലെ ഹര്ത്താല് രാഷ്ട്രീയ തട്ടിപ്പാണെന്ന് ബിജെപി സംസ്ഥാന കമ്മിറ്റിയംഗം എം.ബി.രാജഗോപാല് പറഞ്ഞു. പാര്ലമെന്റില് റബ്ബര്വിഷയം ഉന്നയിക്കാതെ തെരഞ്ഞെടുപ്പ് സമയം ആയപ്പോള് ഹര്ത്താലുമായി ഇറങ്ങിപ്പുറപ്പെട്ടത് ജനങ്ങളുടെ കണ്ണില് പൊടിയിടാനാണ്. അപഹാസ്യമായ സിപിഎമ്മിന്റെ നടപടി ജനങ്ങള് പുച്ഛിച്ചുതള്ളുമെന്ന് യോഗം വിലയിരുത്തി. യോഗത്തില് ജില്ലാ സെക്രട്ടറി എന്.പി.കൃഷ്ണകുമാര്, മണ്ഡലം കണ്വീനര് എം.എസ്. വിശ്വനാഥന്, ജനറല് സെക്രട്ടറിമാരായ പി.സുരേന്ദ്രനാഥ്, പി.പി.ധീരസിംഹന് തുടങ്ങിയവര് പങ്കെടുത്തു.
