മൂലമറ്റം: പലിശക്ക് വാങ്ങിയ പണം തിരികെ നല്കാത്തതിന്റെ പേരില് കിടപ്പാടം എഴുതി വാങ്ങിയതായി പരാതി. പ്രതിയുടെ വീട്ടില് റെയ്ഡ് നടത്തിയ പോലീസ് സംഘം ആധാരം ഉള്പ്പെടെയുളള രേഖകള് പിടിച്ചെടുത്തു. പതിപ്പള്ളി വാത്തുകാട്ട് ഷൈലയുടെ പേരിലാണ് കാഞ്ഞാര് പോലീസ് കേസെടുത്തത്. ഇലപ്പള്ളി വട്ടപ്പാറയില് ഓമനയുടെ പരാതിയുടെ അടിസ്ഥാനത്തിലാണ് കേസ്. രണ്ടുവര്ഷം മുമ്പ് ഷൈലയില് നിന്നും ഓമന രണ്ടുലക്ഷം രൂപ അറുപത് ശതമാനം പലിശയ്ക്ക് വായ്പ വാങ്ങിയിരുന്നു. ഇതില് 160000 രൂപ പലപ്പോഴായി തിരികെ നല്കിയതായി ഓമന പറയുന്നു. എന്നാല് വീണ്ടും 185000 കൂടിവേണമെന്നാവശ്യപ്പെട്ട് ഓമനയെ ഷൈല നിരന്തരം ഭീഷണിപ്പെടുത്തിയിരുന്നു. ഇതിനിടെ നല്കാനുള്ള പണത്തിന് ഈടായി ഓമനയുടെ പക്കല് നിന്നും വസ്തുവിന്റെ ആദാരം ഷൈല കൈവശപ്പെടുത്തിയിരുന്നു. ഷൈല പറഞ്ഞ സമയത്തും പണം നല്കാതെ വന്നതിനെ തുടര്ന്ന് ഓമനയുടെ ഭര്ത്താവ് രവിയുടെ പേരിലുള്ള 22 സെന്റ് സ്ഥലവും വീടും ഷൈല രജിസ്റ്റര് ചെയ്തു വാങ്ങി. ഇതുകൂടാതെ കൂടുതല് ചെക്കുകളും ഷൈല കൈവശപ്പെടുത്തിയിരുന്നു. എഴുതിവാങ്ങിയ വീട്ടില് നിന്നും ബലമായി ഇറക്കിവിടാന് ശ്രമിച്ചതിനെ തുടര്ന്ന് ഓമനയും കുടുംബാംഗങ്ങളും കാഞ്ഞാര് സിഐയ്ക്കു പരാതി നല്കുകയായിരുന്നു. പരാതിയുടെ അടിസ്ഥാനത്തില് പോലീസ് കേസെടുത്തു. ഇതേ തുടര്ന്ന് തിങ്കളാഴ്ച രാവിലെ 11 മണിയോടെ ഷൈലയുടെ പതിപ്പള്ളിയിലെ വീട്ടില് പോലീസ് റെയ്ഡ് നടത്തി ആധാരം ഉള്പ്പെടെയുള്ള രേഖകള് പിടിച്ചെടുത്തു. പ്രതിയെ പിടികൂടിയിട്ടില്ല.
ബ്ലേഡ് ഇടപാടുകാരിയുടെ വീട്ടില് റെയിഡ്: പണമിടപാട് രേഖകള് പിടിച്ചെടുത്തു
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.