ചങ്ങനാശ്ശേരി: തപസ്യ കലാ സാഹിത്യ വേദിയുടെ ആഭിമുഖ്യത്തില് എന്റെ ഭൂമി, എന്റെ ഭാഷ, എന്റെ സംസ്കാരം എന്ന വിഷയത്തെ അടിസ്ഥാനമാക്കിയുള്ള ചിന്താസായാഹ്നം പ്രൊഫ. പി. മാധവന്പിള്ള ഉത്ഘാടനം ചെയ്തു. വിശ്വപ്രേമത്തിലധിഷ്ഠിതമായ ജീവിതമാണ് ഭാരത സംസ്ക്കാരത്തിന്റെ ആധാരം. സര്വ്വചരാചരങ്ങളെയും സ്നേഹിക്കുകയും സംരക്ഷിക്കുകയും എന്നതാണ് നമ്മുടെ പാരമ്പര്യം. നമ്മുടെ ഭൂമിയും ഭാഷയും സംസ്ക്കാരവും നിലനിന്നെങ്കില് മാത്രമേ കേരളം കേരളമായി നിലനില്ക്കുകയുള്ളു.
ഇതിനാല് ഭൂമിയുടെയും ഭാഷയുടെയും സംസ്ക്കാരത്തിന്റെയും മഹത്വം മനസ്സിലാക്കി അതിനെതിരെയുള്ള കടന്നാക്രമണങ്ങളെ ചെറുത്തു തോല്പ്പിക്കാന് ഓരോ കേരളീയനും തയ്യാറാകണമെന്ന് മാധവന്പിള്ള പറഞ്ഞു. തപസ്യ ജില്ലാ പ്രസിഡന്റ് കവനമന്ദിരം പങ്കജാക്ഷന് മുഖ്യപ്രഭാഷണം നടത്തി. മേഖലാ സെക്രട്ടറി പി.എന്. ബാലകൃഷ്ണന്, ജില്ലാ സെക്രട്ടറി പി.ജി. ഗോപാലകൃഷ്ണന്, ജയപ്രകാശ് പൊന്പുഴ, മോഹന്കുമാര് തോപ്പില്, രാമകൃഷ്ണന് നായര് തരംഗ് എന്നിവര് സംസാരിച്ചു.
