പേരൂര്ക്കട: ബധിരനെ മര്ദ്ദിച്ചവശനാക്കിയ ഗുണ്ടകള്ക്കെതിരെ നടപടിയെടുക്കാന് പോലീസ് തയ്യാറാകുന്നില്ലെന്ന് പരാതി. പേരൂര്ക്കട ആയൂര്ക്കോണം പ്രിയാഭവനില് കൃഷ്ണന്നായരുടെ മകന് ബധിരനായ കൃഷ്ണ പ്രസാദിനെയാണ് ഒരു സംഘം ഗുണ്ടകള് മര്ദ്ദിച്ചവശനാക്കിയത്. ഇതു സംബന്ധിച്ച് വട്ടിയൂര്ക്കാവ് പോലീസില് പരാതി നല്കിയിട്ടും പ്രതികളെ അറസ്റ്റ് ചെയ്തില്ല.
കഴിഞ്ഞ 25ന് കൃഷണ പ്രസാദ് ജോലിചെയ്യുന്ന വര്ക്ക് ഷോപ്പില് നിന്നും ഉച്ചക്ക് ഊണ് കഴിക്കുന്നതിനായി വീട്ടിലേക്ക് പോവുകയായിരുന്നു. ചീനിക്കോണത്ത് താമസിക്കുന്ന അനന്തു, അപ്പു, കിച്ചു എന്നിവരുടെ നേതൃത്വത്തിലുള്ള സംഘം തടഞ്ഞു നിറുത്തി മദ്യപിക്കാന് ആവശ്യപ്പെട്ടു. നിരസിച്ച കൃഷ്ണ പ്രസാദിനെ ക്രൂരമായി മര്ദ്ദിച്ചു. പരിക്കേറ്റ് അവശതയിലായ കൃഷ്ണപ്രസാദിനെ മെഡിക്കല്കോളേജ് ആശുപത്രിയില് പ്രവേശിപ്പിച്ചു.
വട്ടിയൂര്ക്കാവ് പോലീസില് പരാതി നല്കിയെങ്കിലും ഈ പ്രദേശത്തെ ബ്ലേഡുകാരന് പോലീസിലുള്ള സ്വാധീനം നിമിത്തം പ്രതികളെ അറസ്റ്റ് ചെയ്യുന്നില്ല. പലിശക്ക് കടം കൊടുത്തത് തിരികെ കിട്ടാതെ വരുമ്പോള് ഈ ഗുണ്ടകളെ ഉപയോഗിച്ചാണ് ബ്ലേഡുകാരന് പണം തിരികെ വാങ്ങിക്കുന്നത്. ബ്ലേഡുകാരനെ കുബേര ലിസ്റ്റില്പ്പോലും പെടുത്താതെ പോലിസ് കൂട്ടുനില്ക്കുന്നതായും ആരോപണമുണ്ട്. ഗുണ്ടാ സംഘം വീണ്ടും മര്ദ്ദിക്കുമെന്ന ഭയത്തിലാണ് ഈ നിര്ദ്ധന കുടുംബം.
