തളിപ്പറമ്പ്: തളിപ്പറമ്പ് താലൂക്ക് ആശുപത്രിയെ ജനറല്‍ ആശുപത്രിയാക്കി ഉയര്‍ത്താനുള്ള ആവശ്യം പരിഗണിച്ച് വേണ്ട നടപടികള്‍ സ്വീകരിക്കുമെന്ന്മന്ത്രി കെ.സി.ജോസഫ് പറഞ്ഞു. താലൂക്ക് ആശുപത്രി സന്ദര്‍ശനത്തിനു ശേഷം സംസാരിക്കുകയായിരുന്നു മന്ത്രി.
മലയോര മേഖലയില്‍ നിന്നടക്കമുള്ള ജനങ്ങള്‍ക്ക് പ്രയോജനപ്രദമാകുന്ന വിധത്തില്‍ ആശുപത്രിയില്‍ കൂടുതല്‍ സൗകര്യങ്ങള്‍ ലഭ്യമാക്കുമെന്ന് മന്ത്രി പറഞ്ഞു.. കാരുണ്യ പദ്ധതിയില്‍ ഉള്‍പ്പെടുത്തി ഡയാലിസ് യൂണിറ്റ്, ഫാര്‍മസി എന്നിവ പ്രവര്‍ത്തനക്ഷമമാക്കും. രക്തബാങ്കിലെ ടെക്‌നീഷ്യന്‍ ഒഴിവ് നികത്തും. രാത്രികാലത്തും ഫാര്‍മസി കാര്യക്ഷമമാക്കുന്നതിനും പ്രവര്‍ത്തന രഹിതമായ സ്‌കാനിംഗ് മെഷീന്‍ മാറ്റി സ്ഥാപിക്കുന്നതിനും നടപടി സ്വീകരിക്കുമെന്നും മന്ത്രി പറഞ്ഞു. ആശുപത്രിയില്‍ ഇപ്പോഴുള്ള ഡോക്ടര്‍മാരുടെയും മറ്റ് ജീവനക്കാരുടെയും ഒഴിവുകള്‍ നികത്തും. ആശുപത്രി അധികൃതരുമായി നടത്തിയ ചര്‍ച്ചയില്‍ ഉയര്‍ന്നുവന്ന എല്ലാ നിര്‍ദ്ദേശങ്ങളും ആരോഗ്യമന്ത്രിയുടെ ശ്രദ്ധയില്‍പ്പെടുത്തുമെന്നും മന്ത്രി അറിയിച്ചു. ജില്ലയില്‍ നിലവില്‍ തലശ്ശേരിയില്‍ മാത്രമാണ് ജനറല്‍ ആശുപത്രി ഉള്ളത്.
ജെയിംസ് മാത്യു എംഎല്‍എ, നഗരസഭാ ചെയര്‍മാന്‍ അള്ളാംകുളം മഹമൂദ്, ഡെപ്യൂട്ടി ഡിഎംഒ ഡോ.എം.കെ.ഷാജ്, താലൂക്ക് ആശുപത്രി സൂപ്രണ്ട് ഡോ.ലത തുടങ്ങിവരും വിവിധ ജനപ്രതിനിധികളും ചര്‍ച്ചയില്‍ പങ്കെടുത്തു.
