ചിറക്കല്‍: ദേശീയ ഐക്യത്തിന്റെ സന്ദേശമുയര്‍ത്തിപ്പിടിച്ച് വിവിധ സംസ്ഥാനങ്ങളിലെ നാടന്‍ കലകളെ ചേര്‍ത്തിണക്കി പരിപാടികള്‍ സംഘടിപ്പിക്കുമെന്ന് മന്ത്രി കെ.സി.ജോസഫ്. കേരള ഫോക്‌ലോര്‍ അക്കാദമി സംഘടിപ്പിച്ച ബസ്തര്‍ ശില്പശാലയില്‍ ശില്‍പികളെ ആദരിച്ച് സംസാരിക്കുകയായിരുന്നു അദ്ദേഹം.
കേരളത്തിലെ നാടന്‍കലകളുടെ പ്രശസ്തി വര്‍ധിപ്പിക്കുന്നതിനും കലകളെ പൊതുസമൂഹത്തിന് മുന്നില്‍ പരിചയപ്പെടുത്തുന്നതിനും ഫോക്‌ലോര്‍ അക്കാദമി എടുക്കുന്ന പങ്ക് അഭിനന്ദനീയമാണെന്ന് മന്ത്രി പറഞ്ഞു.
കെ.എം.ഷാജി എംഎല്‍എ ചടങ്ങില്‍ അധ്യക്ഷത വഹിച്ചു. ഫോക്‌ലോര്‍ അക്കാദമി ചെയര്‍മാന്‍ പ്രൊഫ. ബി.മുഹമ്മദ് അഹമ്മദ്, ക്യാമ്പ് ഡയറക്ടറും ചിത്രകാരനുമായ സുരേഷ് കൂത്തുപറമ്പ്, അക്കാദമി സെക്രട്ടറി എം.പ്രദീപ് കുമാര്‍, രവീന്ദ്രരാജ വര്‍മ തുടങ്ങിയവര്‍ സംസാരിച്ചു. ഛത്തീസ്ഗഡ്, ഝാര്‍ഖണ്ഡ് മേഖലയിലെ ബസ്തര്‍ പ്രദേശത്ത് നിന്നെത്തിയ പത്ത് ലോഹശില്പികളെയാണ് ചടങ്ങില്‍ ആദരിച്ചത്. പരിപാടിയുടെ ഭാഗമായി ഈ കലാകാരന്മാര്‍ നിര്‍മ്മിച്ച ശില്‍പങ്ങളുടെ പ്രദര്‍ശനവും വില്‍പനയും നടന്നു. തുടര്‍ന്ന് കടമ്മനിട്ടയുടെ കിരാതവൃത്തം എന്ന കവിതയുടെ സ്വതന്ത്ര ദൃശ്യാവിഷ്‌കാരവും അവതരിപ്പിച്ചു.
