അഞ്ചല്: അജ്ഞതയുടെ അന്ധകാരത്തില് നിന്ന് അറിവിന്റെ പ്രകാശത്തിലേക്ക് സമൂഹത്തെ നയിക്കുന്നതാണ് മകര സംക്രമ ആഘോഷമെന്ന് ഹിന്ദുഐക്യവേദി സംസ്ഥാന ജനറല് സെക്രട്ടറി ഇ.എസ്.ബിജു പറഞ്ഞു. അഞ്ചല് പനയഞ്ചേരിയില് നടന്ന ആര്എസ്എസ് അഞ്ചല് താലൂക്ക് മകര സംക്രമ ആഘോഷത്തില് മുഖ്യപ്രഭാഷണം നടത്തുകയായിരുന്നു അദ്ദേഹം.
സമാജത്തെ ദേശീയോന്മുഖമായി സംഘടിപ്പിക്കണമെങ്കില് സ്വയം അച്ചടക്കവും ദേശാഭിമാനവുമുള്ള തലമുറ വളര്ന്നുവരണം. ഇന്ന് അഴിമതി സമൂഹത്തെ ഗ്രസിച്ചിരിക്കുന്നു. അക്രമത്തിന്റേയും ഭീകരവാദിക്കൂട്ടങ്ങളുടെയും പരിശീലനക്കളരിയായി നമ്മുടെ നാട് മാറി. പണത്തെ അഹങ്കാരത്തിന്റെ എല്ലാ സീമകളേയും ലംഘിക്കുന്നതിനുള്ള അവകാശമായി ഇന്നു കരുതുന്നു. കുടുംബമെന്ന പവിത്രബന്ധത്തെ ഇല്ലാതാക്കിയിരിക്കുന്നു. ഇന്ന് കടമകള് മറന്ന് അവകാശത്തിനായി വ്യക്തികള് വാദിക്കുന്നു. ധര്മ്മത്തെ ആചരണത്തിലൂടെ നിലനിര്ത്താതെ ധര്മ്മത്തിന് പുതിയ ഭാഷ്യങ്ങള് ചമയ്ക്കുകയാണ് പുത്തന് സാംസ്കാരികനായകര്. മൂല്യബോധം ജീവിതത്തില് പകര്ത്തിയ സ്വയംസേവകര് ഹിന്ദുജീവിതമാകുന്ന സാത്വികബോധത്തെ സമാജത്തില് വളര്ത്തണമെന്നും അദ്ദേഹം പറഞ്ഞു. ഹിന്ദുസമൂഹം ലോകത്തിന് വഴികാട്ടാനൊരുങ്ങുമ്പോള് ചിലര് പുലഭ്യം പറയുന്നു. വിദേശ രാഷ്ട്രങ്ങള് നമ്മെ ഇതേ സമയം അംഗീകരിക്കുന്ന കാഴ്ചയാണെന്നും അദ്ദേഹം കൂട്ടിച്ചേര്ത്തു. ജി.രഘുനാഥന് അദ്ധ്യക്ഷനായിരുന്നു. താലൂക്ക് സംഘചാലക് അഡ്വ.ജി.അനില്കുമാര്, ജില്ലാ ബൗദ്ധിക് പ്രമുഖ് ഉമേഷ്ബാബു തുടങ്ങിയവര് സംസാരിച്ചു.
