തൃശൂര്: ശനിയാഴ്ച രാത്രി 9 മണി മുതല് ആറ് ദിവസം ചാലക്കുടി പുഴയ്ക്കു കുറുകെ പഴയ പാലത്തിലൂടെയുള്ള ഗതാഗതം പൂര്ണമായും നിരോധിക്കും. ചാലക്കുടി ദേശീയ പാതയില് മുരിങ്ങൂര് – കൊരട്ടി – ചിറങ്ങര അടിപ്പാതയുടെ നിര്മാണ പ്രവര്ത്തനങ്ങളുമായി ബന്ധപ്പെട്ടാണ് ഇത്.
അറ്റകുറ്റപണികള്ക്കും ഭാര പരിശോധന നടത്തുന്നതിനും കൂടിയാണ് ഗതാഗതം നിരോധിക്കുന്നത്.ഇതോടൊപ്പം പഴയ പാലത്തിലെ ബെയറിംഗ് മാറ്റും.
ഗതാഗതക്കുരുക്ക് ലഘൂകരിക്കുന്നതിനായി ക്രമീകരണം ഏര്പ്പെടുത്തും. ഗതാഗത നിയന്ത്രണത്തിനായി 10 പൊലീസ് ഉദ്യോഗസ്ഥര്, 10 ട്രാഫിക് വാര്ഡന്മാര്, അഞ്ച് സായുധ പൊലീസ് സേനാംഗങ്ങള്, രണ്ട് ഹോം ഗാര്ഡുകള് എന്നിവരെ നിയോഗിക്കും. 24 മണിക്കൂറും ചാലക്കുടി ഡിവൈഎസ്പി ഓഫീസില് പ്രവര്ത്തിച്ചു വരുന്ന കണ്ട്രോള് റൂമും ഹൈവേ പൊലീസിന്റെ പ്രത്യേക നിരീക്ഷണവും പ്രദേശത്തുണ്ടാകും.
പഴയപാലം അടച്ചിടുന്നതിനാല് കിഴക്കു ഭാഗത്തുള്ള പാലത്തിലൂടെ ഇരുവശത്തേക്കും വാഹനങ്ങള് ഓരോ വരി വീതം കടത്തിവിടും. ഗതാഗത കുരുക്ക് ഒഴിവാക്കാനായി തൃശൂര് ഭാഗത്തു നിന്നു എറണാകുളം ഭാഗത്തേക്ക് പോകുന്ന വാഹനങ്ങളെ കോട്ടമുറിയില് നിന്നു തിരിഞ്ഞ് സാജോ നഗര്, പാറക്കൂട്ടം, കിന്ഫ്ര, കോനൂര്, പെരുമ്പി വഴി ദേശീയപാതയിലേക്ക് തിരിച്ചു വിടും. എറണാകുളം ഭാഗത്തു നിന്നു തൃശൂരിലേക്ക് വരുന്ന വാഹനങ്ങളെ ചിറങ്ങര മേല്പ്പാലം വഴി തിരിഞ്ഞ് ദേവമാത, കൊരട്ടി പള്ളി, കാടുകുറ്റി, മുരിങ്ങൂര് വഴി ദേശീയപാതയിലേക്ക് തിരിച്ചു വിടും.
