കണ്ണൂര്‍: ജൈവകാര്‍ഷിക ഉല്പന്നങ്ങള്‍ എന്നപേരില്‍ ഗുണനിലവാരം കുറഞ്ഞ വസ്തുക്കള്‍ വിപണനം ചെയ്യുന്നതിനെതിരെയും അശാസ്ത്രീയമായ രീതിയില്‍ ജൈവകൃഷി നടപ്പിലാക്കുന്നതിരെയുമുള്ള ബോധവല്‍ക്കരണത്തിന്റെ ഭാഗമായി ഈ ജൈവം യഥാര്‍ത്ഥ ജൈവമോ എന്ന സംവാദം സംഘടിപ്പിച്ചു.
റിട്ട.കൃഷി ഉദ്യോഗസ്ഥന്മാരുടെ സംഘടനയായ അഗ്രികോസ് അസോസിയേഷന്‍ ഫോര്‍ പ്രമോഷന്‍ ഓഫ് സസ്‌സ്റ്റെയിനബിള്‍ അഗ്രിക്കള്‍ച്ചര്‍ (ആപ്‌സാ)യുടെ നേതൃത്വത്തിലുള്ള ഹരിതവിചാരണവേദിയാണ് സംവാദത്തിനു കളമൊരുക്കിയത്.
കണ്ണൂര്‍ ജില്ലിയില്‍ ഉല്പാദിപ്പിക്കുന്ന കാര്‍ഷിക ഉല്‍പന്നങ്ങളില്‍ 4% താഴെ മാത്രമേ യഥാര്‍ത്ഥ ജൈവകാര്‍ഷിക ഉല്പന്നങ്ങള്‍ ഉള്ളൂവെന്ന് വിഷയം അവതരിപ്പിച്ച പന്നിയൂര്‍ കൃഷി വിജ്ഞാന കേന്ദ്രം മേധാവി ഡോക്ടര്‍ പി.ജയരാജ് പറഞ്ഞു. മറ്റുള്ളവയെ സുരക്ഷിത ഭക്ഷ്യവസ്തുക്കളെന്നോ, വിഷം കലര്‍ന്ന ഭക്ഷ്യവസ്തുക്കളെന്നോ പറയേണ്ടിവരും. എന്നാല്‍ ജൈവ പച്ചക്കറികള്‍ എന്നും ജൈവ വെളിച്ചെണ്ണ എന്നും മറ്റുമുള്ള ലേബലുകളില്‍ ഉപഭോക്താക്കളെ തെറ്റിദ്ധരിപ്പിച്ച് വലിയ വില ഈടാക്കി വിപണനം നടത്തുകയാണ്.
ജൈവകാര്‍ഷിക ഉല്പന്നങ്ങളുടെ ഗുണനിലവാരം പരിശോധിക്കാനുള്ള യാതൊരുവിധ സംവിധാനവും ജില്ലയില്‍ നിലവിലില്ലെന്നരിക്കെ ഉപഭോക്താക്കള്‍ വ്യാപകമായി കളബളിപ്പിക്കപ്പെടുന്നു. ഒരു കൃഷിക്ക് രാസവസ്തുക്ക്ള്‍ ഉപയോഗിക്കപ്പെടുന്നില്ലെങ്കില്‍ അതിനെ സുരക്ഷിത ഭക്ഷ്യവസ്തുവായി പരിഗണിക്കാം. എന്നാല്‍ ജൈവകാര്‍ഷിക ഉല്പന്നമെന്ന് അവകാശപ്പെടുവാന്‍ ശാസ്ത്രീയ ജൈവകൃഷിയുടെ മാനദണ്ഡങ്ങള്‍ നിര്‍ബന്ധമായും പാലിക്കണമെന്ന് ഡോക്ടര്‍ ജയരാജ് പറഞ്ഞു. ഈ കാര്യത്തില്‍ കര്‍ഷകരെയും ഉപഭോക്താക്കളെയും ബോധവല്‍ക്കരിക്കുന്ന പ്രവര്‍ത്തനങ്ങള്‍ ഏറ്റെടുക്കാനും യോഗം തീരുമാനിച്ചു. ജൈവകൃഷിയില്‍ അനുവര്‍ത്തിക്കേണ്ട പ്രധാന പ്രവര്‍ത്തനങ്ങളും യോഗം ചര്‍ച്ച ചെയ്തു.
പ്രോജക്ട് ഡയറക്ടര്‍ കെ.പി.ജയരാജന്‍ മോഡറേറ്ററായി. യോഗത്തില്‍ ജൈവ കര്‍ഷകരായ സി.വി.സുമജന്‍, കെ.വി.രാഘവന്‍ മാസ്റ്റര്‍, ടി.പ്രകാശന്‍, കേളോത്ത് നാണു, വി.എ.ദിനേശന്‍, കെ.കൃഷ്ണദാസ്, മേജര്‍ ഇ.കെ.നായനാര്‍, പി.മാധുരി എന്നിവര്‍ സംസാരിച്ചു. ആപ്‌സാ പ്രസിഡണ്ട് എം.കെ.അബ്ദുറഹിമാന്‍ അധ്യക്ഷത വഹിച്ചു. സെക്രട്ടറി വി.സുരേഷ് സ്വാഗതവും വൈസ് പ്രസിഡണ്ട് കെ.ഒ.അരവിന്ദാക്ഷന്‍ നന്ദിയും പറഞ്ഞു.
