ക്വറ്റ: പാക്കിസ്ഥാനിലെ ക്വറ്റയില് പോളിയോ വാക്സിനേഷന് കേന്ദ്രത്തിലുണ്ടായ ശക്തമായ സ്ഫോടനത്തില് 14 പേര് കൊല്ലപ്പെട്ടു. 10 പേര്ക്ക് പരിക്കേറ്റു. കൊല്ലപ്പെട്ടവരില് 13 പേര് പോലീസുകാരാണ്. ചാവേര് സ്ഫോടനമാണ് നടന്നതെന്നാണ് നിഗമനം.
പോളിയോ ജോലിക്കാര്ക്ക് സുരക്ഷയൊരുക്കാന് എത്തിയ പോലീസുകാരാണ് സ്ഫോടനത്തില് മരിച്ചത്. പരിക്കേറ്റവരില് അഞ്ച് പേരുടെ നില ഗുരുതരമാണെന്ന് പാക് മാധ്യമമായ ഡോണ് റിപ്പോര്ട്ട് ചെയ്യുന്നു. സ്ഫോടനം നടന്ന പ്രദേശത്തിന്റെ സുരക്ഷ സൈന്യം ഏറ്റെടുത്തു. സ്ഫോടനത്തിനു പിന്നില് ആരാണെന്നു വ്യക്തമായിട്ടില്ല. സ്ഫോടനത്തെ തുടര്ന്ന് പോളിയോ വിതരണം റദ്ദാക്കി.
ബലൂചിസ്ഥാന് മുഖ്യമന്ത്രി നവാബ് സനയുള്ള ഷെരി സ്ഫോടനത്തെ ശക്തമായി അപലപിച്ചു. ഭീകരവാദം വച്ചുപൊറുപ്പിക്കില്ലെന്നും കുറ്റക്കാര്ക്കെതിരേ ശക്തമായ നടപടിയെടുക്കുമെന്നും അദ്ദേഹം പറഞ്ഞു. മൂന്ന് ദിവസത്തെ പോളിയോ വിരുദ്ധ പരിപാടിയുടെ അവസാന ദിനമായിരുന്നു ഇന്ന്. അഞ്ച് വയസില് താഴെയുള്ള 24 ലക്ഷം കുട്ടികള്ക്കാണ് പോളിയോ തുള്ളിമരുന്ന നല്കാന് ഉദ്ദേശിച്ചിരുന്നത്. അഫ്ഗാന് അഭയാര്ഥികളായ 55,000 കുട്ടികളെയും പദ്ധതിയില് ഉള്പ്പെടുത്തിയിരുന്നു.
പാക്കിസ്ഥാനിലെ പോളിയോ കേന്ദ്രങ്ങള്ക്ക് നേരേ മുന്പും സമാനമായ ആക്രമണങ്ങള് ഉണ്ടായിട്ടുണ്ട്. 2012 ഡിസംബറില് ഇത്തരത്തില് നടന്ന ആക്രമണത്തില് 80 പേര് മരിച്ചിരുന്നു. പാക്കിസ്ഥാനിലെ കുട്ടികളുടെ ആരോഗ്യം നശിപ്പിക്കാന് പശ്ചാത്യര് നടത്തുന്ന ഗൂഢാലോചനയാണ് വാക്സിനേഷന് എന്നാണ് ഭീകര സംഘടനകളുടെ വാദം.
ലോകാരോഗ്യ സംഘടനയുടെ കണക്കു പ്രകാരം പോളിയോ രോഗം നിലനില്ക്കുന്ന രണ്ടു രാജ്യങ്ങളില് ഒന്നാണ് പാക്കിസ്ഥാന്.
