കണ്ണൂര്: കോടിയേരി ഗണപതി വിലാസം പ്രിബേസിക് എല്പി സ്കൂളിലെ പാചകത്തൊഴിലാളിയായ യുവതിയെ പീഡിപ്പിക്കാന് ശ്രമിക്കുകയും അന്യായമായി ജോലിയില് നിന്നും ഒഴിവാക്കുകയും ചെയ്ത സ്കൂളിലെ പ്രധാനാധ്യാപകന് ടി.സി.പ്രദീപനെതിരെ കേസെടുക്കണമെന്നാവശ്യപ്പെട്ട് ആഭ്യന്തമന്ത്രിക്ക് പരാതി നല്കിയതായി സിറ്റിസണ്സ് എഗൈന്സ്റ്റ് കറപ്ഷന് ആന്റ് ഇന്ജസ്റ്റിസ് (കക്കായ) ചീഫ് കോഡിനേറ്റര് ശ്രീധരന് തേറമ്പില് പത്രസമ്മേളനത്തില് പറഞ്ഞു. കേസൊതുക്കിത്തീര്ക്കാനും യുവതിയെ ജോലിയില് നിന്ന് പിരിച്ച് വിട്ടതിനും പിന്നില് ഇടത് അധ്യാപക സംഘടനയായ കെഎസ്ടിഎ ആണെന്നും ഇദ്ദേഹം ആരോപിച്ചു.
~പാചകത്തൊഴിലാളിക്കെതിരെ ഒന്നില് കൂടുതല് തവണ പീഡനശ്രമം നടന്നിരുന്നു. എന്നാല് 2014 ല് ആദ്യം നടന്ന സംഭവത്തില് പരാതി നല്കാന് യുവതി തയ്യറായില്ല. തുടര്ന്ന് വീണ്ടും ആവര്ത്തിച്ചപ്പോഴാണ് യുവതി ഭര്ത്താവിനോട് കാര്യങ്ങള് അവതരിപ്പിച്ചത്. സംഭവവുമായി ബന്ധപ്പെട്ട് ന്യൂമാഹി പോലീസിലും തലശേരി പോലീസിലും പരാതി നല്കിയെങ്കിലും കേസെടുത്തില്ല. കൂടാതെ യുവതിയുടെ പരാതി നിര്ബന്ധിച്ച് പിന്വലിപ്പിക്കാനാണ് ശ്രമിച്ചതെന്നും പ്രതിയെ സംരക്ഷിക്കാന് ഇടത് അധ്യാപക സംഘടനയായ കെഎസ്ടിഎ മുന്നോട്ട് വന്നത് സ്ത്രീ സമൂഹത്തോടുള്ള വെല്ലുവിളിയാണെന്നും ഇവര് ആരോപിച്ചു. സംഭവത്തില് സംസ്ഥാന വനിതാ കമ്മീഷന് അധ്യക്ഷ കെ.സി. റോസക്കുട്ടിക്കും പരാതി നല്കിയിട്ടുണ്ട്. പരാതിയില് മേല്നടപടികള് സ്വീകരിച്ചില്ലെങ്കില് 30 ന് സെക്രട്ടറിയേറ്റ് പടിക്കല് സ്കൂള് പാചകതൊഴിലാളികളും മനുഷ്യാവകാശ പ്രവര്ത്തകരും കുത്തിയിരിപ്പ് സമരം നടത്തുമെന്നും ശ്രീധരന് തേറമ്പില് പറഞ്ഞു. പത്രസമ്മേളനത്തില് എം.അനിത, പുഷ്പറാണി, വത്സലന്, സതി ഭാസ്കരന് എന്നിവരും സംബന്ധിച്ചു.
