കണ്ണൂര്: കേരള അഗ്രോ മെഷിനറി കോര്പ്പറേഷന്റെ ന്യൂ ജനറേഷന് പവ്വര്ടില്ലറിന്റേയും മറ്റ് നൂതന കാര്ഷിക യന്ത്രങ്ങളുടേയും ഉല്പാദന കേന്ദ്രത്തിന്റെ ഉദ്ഘാടനം കൂത്തുപറമ്പ് വലിയവെളിച്ചത്ത് മന്ത്രി കെ.പി.മോഹനന് ഉദ്ഘാടനം ചെയ്തു. കാര്ഷിക മേഖലയില് നിന്നും ജനങ്ങള് പിറകോട്ടുപോകുന്നതില് യന്ത്രങ്ങളുടെ അപര്യാപ്തതയും പ്രധാനകാരണമാണെന്ന് മന്ത്രി പറഞ്ഞു. പുതുതലമുറക്ക് അനുസൃതമായി ആധുനിക യന്ത്രങ്ങള് ഉണ്ടാക്കും. കേരളത്തിലെ കാര്ഷിക മേഖലക്ക് ഉപയുക്തമായ പ്രധാന യന്ത്രങ്ങള് ഉല്പാദിപ്പിക്കുന്ന കേന്ദ്രമായി ഇതുമാറും. അന്യരാജ്യങ്ങളിലേക്ക് യന്ത്രങ്ങള് കയറ്റുമതി ചെയ്യാനുമാകും. നിരവധി പേര്ക്ക് തൊഴിലവസരങ്ങള് ഇതുവഴി ഉണ്ടാകും. 50 കേടി രൂപ ചെലവില് മെഗാ ഫുഡ്പാര്ക്ക് വലിയവെളിച്ചത്ത് വരാന് പോകുന്നത് ഭക്ഷ്യോല്പാദന രംഗത്ത് സംരംഭങ്ങള് തുടങ്ങാന് ആഗ്രഹിക്കുന്നവര്ക്ക് ശുഭവാര്ത്തയാണെന്നും മന്ത്രി പറഞ്ഞു. 22 കോടി രൂപ ചെലവഴിച്ചാണ് പദ്ധതി പൂര്ത്തിയാക്കിയത്. കാര്ഷിക യന്ത്രവല്ക്കരണത്തിന് നിര്ണ്ണായകപങ്ക് വഹിച്ചു കൊണ്ടിരിക്കുന്ന കാംകോയുടെ ആറാമത്തേയും മലബാറിലെ ആദ്യത്തേതുമായ യൂണിറ്റാണിത്.
ചിറ്റാരിപ്പറമ്പ് ഗ്രാമ പഞ്ചായത്ത് പ്രസിഡണ്ട് യു.പി. ശോഭ അധ്യക്ഷത വഹിച്ചു. കാംകോ എംഡി കെ.സുബൈര്ഖാന് റിപ്പോര്ട്ട് അവതരിപ്പിച്ചു. മുന്സിപ്പല് ചെയര്മാന് എം. സുകുമാരന്, പാട്യം ഗ്രാമപഞ്ചായത്ത് പ്രസിഡണ്ട് വി. ബാലന് മാസ്റ്റര്, കുന്നോത്ത്പറമ്പ് ഗ്രാമപഞ്ചായത്ത് പ്രസിഡണ്ട് കരുവാംകണ്ടി ബാലന്, തൃപ്പങ്ങോട്ടൂര് പഞ്ചായത്ത് പ്രസിഡണ്ട് കാട്ടൂര് മുഹമ്മദ്, മുന് എംഎല്എ കെ.എം.സൂപ്പി, കെ.ലീല, പി.പി.ദിവാകരന് തുടങ്ങിയവര് സംസാരിച്ചു. കാംകൊ ചെയര്മാന് ചാരുപാറ രവി സ്വാഗതവും ഡയറക്ടര് കെ.പി. ചന്ദ്രന് നന്ദിയും പറഞ്ഞു.
