കൂത്തുപറമ്പ്: കോട്ടയം ചിറയുടെ പുനരുദ്ധാരണ പ്രവൃത്തി സംസ്ഥാന സര്‍ക്കാരിന്റെ സഹസ്ര സരോവര്‍ പദ്ധയില്‍പ്പെടുത്തി പൂര്‍ത്തീകരിച്ചതിന്റെ ഉദ്ഘാടനം മന്ത്രി കെ.പി മോഹനന്‍ നിര്‍വഹിച്ചു. കൂത്തുപറമ്പ് കോട്ടയംചിറ സംരക്ഷിക്കാന്‍ പ്രത്യേക സമിതി രൂപീകരിച്ച് ധനസഹായം നല്‍കുമെന്ന് ഉദ്ഘാടന ഭാഷണത്തില്‍ അദ്ദേഹം പറഞ്ഞു. പഞ്ചായത്ത്, ക്ഷേത്ര ഭാരവാഹികള്‍ എന്നിവരടങ്ങിയ സമിതിക്കായിരിക്കും സംരക്ഷണ ചുമതല. ചിറകളും കുളങ്ങളും പഴയ കാലത്തെ ജീവനമാണ്. നാടിന്റെ ഭദ്രതക്കാവശ്യമായ ഇവ സംരക്ഷിക്കപ്പെടണം. കാര്‍ഷിക മേഖല നശിക്കാന്‍ പ്രധാന കാരണം പ്രകൃതിയെ നശിപ്പിക്കുന്നതാണെന്നും മന്ത്രി പറഞ്ഞു.
സഹസ്രസരോവര്‍ പദ്ധതിയില്‍പ്പെടുത്തി നവീകരണം പൂര്‍ത്തീകരിച്ച ഏറ്റവും വലുതും ആദ്യത്തേതുമായ ജലാശയമാണിത്. കേന്ദ്ര-സംസ്ഥാന സര്‍ക്കാരുകളുടെതായി 4.82 കോടിരൂപയാണ് വിവിധ ഘട്ടങ്ങളില്‍ പ്രവൃത്തിക്കായി ചെലവഴിച്ചത്. കേന്ദ്ര പദ്ധതിയായ ആര്‍കെവിവൈ, നബാര്‍ഡ് എന്നിവക്ക് പുറമെ ഔഷധ സസ്യങ്ങളും തണല്‍ മരങ്ങളും പിടിപ്പിക്കാന്‍ സംസ്ഥാന ഹോര്‍ട്ടി കള്‍ച്ചറല്‍മിഷന്റെ സാമ്പത്തിക സഹായവും ഇതില്‍ പെടും. മുനിസിപ്പല്‍ ചെയര്‍മാന്‍ എം.സുകുമാരന്‍, അഡ്വ.എം.കെ. രഞ്ജിത്ത്, എം.പി. മുരളി, കെ. ചന്ദ്രന്‍, എന്നിവര്‍ സംസാരിച്ചു. കേരള ലാന്റ് ഡവലപ്പ്‌മെന്റ് കോര്‍പ്പറേഷന്‍ ചെയര്‍മാന്‍ ബെന്നി കക്കാട് ആമൂഖഭാഷണം നടത്തി. കോട്ടയം ഗ്രാമപഞ്ചായത്ത് പ്രസിഡണ്ട് ടി ഷബ്‌ന സ്വാഗതവും ടിപി ശ്രീധരന്‍ മാസ്റ്റര്‍ നന്ദിയും പറഞ്ഞു.
